झण्डै ३ किलो अवैध लागु औषध अफिम सहित एक पुरुष पक्राउ परेका छन् । मंगलबार विहान ३ बजेतिर सानीभेरी गाउँपालिका ३, गरायलाबाट ५३ वर्षीय गोर्खबहादुर कुसारी पक्राउ परेका हुन् । सानीभेरी गाउँपालिका ६, कोट घर भएका उनको साथबाट प्रहरीले २ किलो ७ सय ग्राम अफिम फेला पारेको छ । अँध्यारोमा शंकास्पद अवस्थामा हिडिरहेको देखेपछि प्रहरीले उनलाई खानतलासी गरेको थियो ।

सोही क्रममा प्लाष्टिकमा बेरेर राखेको अवस्थामा अफिम भेटिएको जिल्ला प्रहरी कार्यालय रुकुम पश्चिमका प्रमुख प्रहरी नायव उपरीक्षक ठगबहादुर केसीले जानकारी दिनुभयो । कर्णाली प्रदेशको लागु औषध नियन्त्रण व्युरो सुर्खेत र जिल्ला प्रहरी कार्यालयको सयुंक्त गस्ति टोलीले उनलाई पक्राउ गरेको हो । प्रहरीले थप अनुसन्धान थालेको उनीमाथी लागु औषध ओसार पसार सम्बन्धि मुद्दा चलाइने बताइएको छ ।