रुकुम पश्चिमको मुसीकोट नगरपालिका १, ले मोटरसाईकल पार्किङ गरेको शुल्क लिने भएको छ । वडाले बालमन्दिर प्राङगनलाई पार्किङ स्थल तोकेर पार्किङ शुल्क लिने भएको हो । आज वडामा भएको सर्वपक्षिय बैठकले वजारमा हुने अव्यवस्थित पार्किङलाई व्यवस्थित बनाउन पार्किङ स्थल तोक्दै शुल्क लिने निर्णय गरेको छ ।

बालमन्दिरमा पार्किङ गरे वापत २ घण्टा सम्मको लागि एउटा मोटरसाईकलको १० रुपैयाँ र दिन भर पार्किङ गरेको २० रुपैयाँ शुल्क निर्धारण गरिएको छ । जथाभावी मोटरसाईकल पार्किङ गर्दा वजारमा हिडडुल तथा किनमेल गर्न गाह्रो भएको र दुर्घटनाको जोखिम बढेकाले मोटरसाईकल पार्किङको व्यवस्था गरिएको वडा अध्यक्ष बिरवल केसीले जानकारी दिनुभयो । 

पार्किङ स्थल बालमन्दिरको प्राङ्गन तोकिएकोले बजारमा जथाभावी पार्किङ गरेको पाईएमा कानुन अनुसार कार्वाही गर्न प्रहरीलाई पत्रचार पनि गरिएको उहाँको भनाई छ । त्यस्तै खंलगा वजारका चोक तथा गल्लीहरुमा फोहोर थुप्रिने गरेको गुनासो बढेपछि टोल तथा वजार क्षेत्रको सरसफाई व्यवस्थापन सम्वन्धी अनुगमण तथा निरीक्षण गर्ने निर्णय पनि भएको छ ।

त्यस्तै खंलगा बजार क्षेत्र भित्र जथाभावी निर्माण सामग्री फालिएको, पशुचौपाय छाडा छाड्ने गरेको पाईएकोले त्यस्ता कार्य नगर्न अनुरोध पनि गरिएको छ । वजारमा पशु चौपाय छाडा छोडेको र निर्माण सामग्री जथाभावी फालेको पाईएमा कारबाही गरिने वडा अध्यक्ष केसीले जानकारी दिनुभयो । 

वजारका घरका छतबाट सडक तथा मानिस आवत जावत गर्ने गल्लीहरुमा पाईप मार्फत पानी, फोहोर खसाउने काम भैरहेकाले तत्काल एक हप्ता भित्र छतबाट पानी खसाउने कार्य रोक्न पनि आग्रह गरिएको छ । यो काम नरोकिएमा कारबाही हुने वडाले चेतावनी दिएको छ ।