दर खाने दिन भनेर हरितालिका तीजको अघिल्लो दिनलाई भन्ने गरिन्छ । श्रीमानको आयु लामो होस् सोचेको मनोकामना पूरा हुन भनी व्रत बस्ने महिलाहरु तीजको अघिल्लो दिनलाई दर खाने दिन भनेर मनाउने गरेका छन् । तर पछिल्लो समय तीज आउनु अगावै तीजको दर खाने चलन चलेको छ । यस्तै घटना भएको छ रुकुम पूर्वको जिल्ला अस्पतालमा । 

जिल्ला अस्पताल व्यवस्थापन समितिका अध्यक्ष सहित अस्पतालका सम्पुर्ण स्वास्थ्यकर्मी तथा कर्मचारीहरु शनिबार दर खान निस्केका हुन । ५२ वर्षिया आमा सिता थापाको उपचारको लागि सिस्ने ५ टाकुराका ओमप्रकाश थापा शनिबार दिउँसो २ बजे अस्पताल पुग्दा अस्पतालमा कुनै स्वास्थ्यकर्मी भेटिएनन् ।

अस्पताल जस्तो संवेदनशिल क्षेत्र रित्तो बनाएर दर खाने कार्यक्रमले विरामीलाई समस्या बनाएको थापाको भनाई छ । विरामीको चाप हुँदा पनि अस्पतालका स्वास्थ्यकर्मी तथा कर्मचारी भने अस्पताल नै रित्तो पारेर  दर खादै नाचगान गरिरहेको थापाले जानकारी दिनुभयो । अस्पताल प्रमुख डाक्टर गणेश चौधरीले भने अस्पताल सबै कर्मचारी तथा स्वास्थ्यकर्मीले एकै साथ सेवा दिने ठाउँ नभएको बताउनुभयो ।

आफु दर खान गएको भएता पनि अन्य स्वास्थ्यकर्मी मार्फत विरामीलाई सेवा प्रवाह गरिएको दावी डाक्टर चौधरीको छ । तीजमा विदा बस्न नपाउने भएको कारण नर्स कर्मचारीहरुले दर खाने कार्यक्रमको आयोजना गरेको हुदा आफु पनि त्यहाँ  सहभागी भएको अस्पताल व्यस्थापन समितिका अध्यक्ष फत्तेकुमारी ओली ले स्विकार्नु भएको छ ।