नेत्रविक्रम चन्द विप्लव नेतृत्वको नेपाल कम्युनिष्ट पार्टी नेकपा निकट अखिल क्रान्तिकारी रुकुम पश्चिमको २७ औं जिल्ला सम्मेलन सम्पन्न भएको छ । जिल्ला सदरमुकाम खलंगामा भएको सम्मेलनले सोम्पाल कामीको अध्यक्षतामा ३१ सदस्यीय जिल्ला समिति गठन गरेको छ ।
संगठनको उपाध्यक्षमा प्रकाश विक, सचिव धनु ओली, सह सचिव शोभा डाँगी र कोषाध्यक्षमा शेरबहादुर विष्ट चयन भएका छन् । सम्मेलनका लागि केही दिन अघि सोम्पाल कामीको संयोजकत्वमा जिल्ला सम्मेलन आयोजक समिति गठन गरिएको थियो ।
संयोजक कामीको अध्यक्षता, पार्टीका केन्द्रीय सदस्य विश्वको प्रमुख आतिथ्यता, केन्द्रीय स्कुल विभागका सदस्य गति, पार्टीका जिल्ला सेक्रेटरी चन्द्र, अखिल क्रान्तिकारीका राप्ती व्युरो संयोजक दिपक विष्टको उपस्थितिमा सम्मेलन सम्पन्न भएको हो । सम्मेलनमा गाउँ तथा नगर समितिका संयोजकहरुले कामकाजि रिर्पोट प्रस्तुत गरेको नवनिर्वाचित सचिव धनु ओलीले जानकारी दिनुभयो ।
सम्मेलनमा २६ औं जिल्ला सम्मेलनपछि संगठनले गरेका गतिविधि, संगठनको इतिहास, आगामी कार्यभार सहितको प्रतिवेदन पेश भएको थियो । संगठनका निवर्तमान अध्यक्ष प्रेमप्रशान्त बोहराले उक्त प्रतिवेदन पेश गर्नुभएको थियो । सम्मेलनबाट निर्वाचित समिति र निर्णयबारे जिल्ला अध्यक्ष कामीले एक विज्ञप्ती जारी गरी सार्वजनिक गर्नुभएको छ ।
