जिल्ला प्रहरी कार्यालय रुकुम पश्चिमले अवैध लागू औषध चरेश सहित दुई महिलालाई पक्राउ गरेको छ । जिल्लाको बाँफिकोट गाउँपालिकाबाट दुई केजी चरेश सहित प्रहरीले दुई महिलालाई पक्राउ गरेको हो । पक्राउ पर्नेमा बाँफिकोट गाउँपालिका वडा नं. ६ जिपसिङकी ५० वर्षिया जसी राना र सोही ठाउँकी अन्दाजी ५० वर्षिया मीनाकुमारी शाही रहेको जिल्ला प्रहरी प्रमुख प्रहरी नायव उपरीक्षक ठगवहादुर केसीले जानकारी दिनुभयो ।

सोही वडाको परिवनमा अवैध लागू औषध ओसार पसार भइरहेको गोप्य सूचनाका आधारमा अस्थायी प्रहरी पोष्ट मग्माबाट खटिएको प्रहरी टोलीले चरेश सहित दुई महिलालाई पक्राउ गरेको डिएसपि केसीले बताउनुभयो । उनिहरु माथि थप अनुसन्धान र कानुनी प्रक्रिया चाल्ने काम भइरहेको प्रहरीले जनाएको छ । जिल्लामा लागू औषध सहित पक्राउ पर्ने क्रम बढिरहेको छ । यो संगै गत वर्षको असोज देखि अहिलेसम्म लागू औषध सहित पक्राउ पर्नेको संख्या १६ पुगेको छ । जसमा ७ जना जाजरकोट जिल्लाका रहेका छन् ।