ढुङ्गाले च्यापेर गम्भिर घाइते भएका रुकुम पूर्वका एक जनालाई हेलिकोप्टर मार्फत उद्धार गरिएको छ । माहुरीको घार राख्न भिरमा गएका सिस्ने गाउँपालिका वडा नम्बर ५ का तुलबहादुर खड्कालाई माथीबाट खसेको ढुङ्गाले किच्दा गम्भिर घाइते हुनभएको थियो । वडाकै रुमालबारा भन्ने ठाउँको भिरमा माहुरी बस्ने घार राख्ने क्रममा माथीबाट झरेको ढुङ्गाले च्यापेको प्रत्यक्षदर्शी दलबहादुर खत्रीले बताउनुभयो । 

खड्काको दुवै खुट्टा र कम्मरमा गहिरो चोट लागेको रुकुम पूर्वका प्रहरी प्रमुख प्रहरी नायव उपरीक्षक गणेशबहादुर श्रेष्ठले जानकारी दिनुभयो । घटनालगत्तै खड्कालाई रुकुम पूर्व अस्पतालमा ल्याइएको थियो । अस्पतालमा प्राथमिक उपचारपछि खड्कालाई हेलिकोप्टर मार्फत काठमान्डौं लगिएको हो । उहाँको जिल्लामा थप उपचारको सम्भावना नभएपछि काठमान्डौं स्थित ट्रमा सेन्टरमा रिफर गरिएको रुकुम पूर्व अस्पतालका डाक्टर क्षितिज नेपालीले बताउनुभयो ।