रुकुम पश्चिमका मानसिंह ओली (प्रभास)ले थप २ विश्व रेकर्ड राख्नुभएको छ । आठबीसकोट नगरपालिका ११ चौरका २० वर्षिय ओलीले भर्खरै २ विश्व रेकर्ड आफ्नो नाममा राख्नुभएको हो । असोज ४ गते काठमाडौंको बानेश्वर स्थित शान्तिनगरमा भएको कार्यक्रमबाट ओलीले औलामा सबैभन्दा लामो समय प्लेट घुमाउने र गिनिज बुक अफ वर्ल्ड रेकर्डको किताब औलाले घुमाएर सबैभन्दा बढी फन्को लगाउने रेकर्ड बनाउनुभएको हो । उहाँले ४ घण्टा ४ मिनेट ४४ सकेण्डसम्म प्लेट औंलामा घुमाउने रेकर्ड आफ्नो नाममा गर्नुभएको छ । यसअघि सो रेकर्ड भारतका हिमान्सु गुप्ताको नाममा थियो । उनले २ घण्टा १० मिनेट ४ सकेण्डमा यो रेकर्ड राखेका थिए । याे रेकर्ड ओलीले तोड्नुभएको छ ।
त्यस्तै ओलीले गिनिज बुक अफ वर्ल्ड रेकर्डको १२ सय ग्राम तौल भएको किताब हातको औंलामा एक मिनेटमा ३ सय ५३ पटक घुमाएर रेकर्ड बनाउनुभएको छ । यो रेकर्ड नेपालकै राजन घिमिरेको नाममा थियो । उहाँले एक मिनेटमा ३ सय १५ पटक किताब घुमाएर रेकर्ड राख्नुभएको थियो । व्यालेन्स ग्रुप अफ कम्पनी र हिमालयन अर्गानिक मार्टको सहकार्यमा भएको कार्यक्रममा दुई विश्व रेकर्ड राख्नुभएको हो । यो संगै ओलीको नाममा तीन वटा विश्व रेकर्ड कायम भएका छन् । ओलीले यसअघि गिनिज बुक अफ वर्ल्ड रेकर्डको किताब हातको एउटा औंलामा ३ घण्टा ४० मिनेटसम्म घुमाएर विश्व रेकड राख्नुभएको थियो ।
