रुकुम पूर्वको पुथाउत्तरगंगा गाउँपालिकाका १ नम्बर वडाध्यक्ष मकरसिङ गुरुङको निधन भएको छ । उहाँको सोमबार विहान मैकाेट स्थित घरमै निधन भएको हो । झण्डै ३ वर्षदेखि कलेजो सम्बन्धि रोगले ग्रस्त उहाँ दुई वर्षदेखि नै उपचारको शिलशिलामा काठमाण्डौंमा हुनुहुन्थ्यो ।

उपचार सम्भव नहुने भएपछि आइतबार मात्रै उहाँलाई घर पुर्याइएको थियो । घर पुर्याएपछि उहाँको निधन भएको कार्यवाहक वडाध्यक्ष मग कामीले जानकारी दिनुभयो । मृतक गुरुङका एक श्रीमती, २ छोरा र १ छोरी छन् । विगत जनयुद्धको क्रममा उहाँ पूर्णकालिन हुनु भएको थियो । उहाँ जनमुक्ति सेनाको विग्रेड सह कमाण्डर सम्म पुग्नुभएको थियो ।

सेना समायोजनको क्रममा उहाँले स्वेच्छिक अवकाश रोज्नुभएको थियो । २०७४ असार १४ गते भएको स्थानीय तहको निर्वाचनमा उहाँ नेकपा माओवादी केन्द्रबाट वडाध्यक्षमा निर्वाचित हुनुभएको थियो । हाल उहाँ नेकपा माओवादी केन्द्र रुकुम पूर्वका जिल्ला सचिवालय सदस्य समेत हुनुहुन्थ्यो ।