कोरोना भाईरस (कोभिड–१९) का कारण ठप्प भएको खेल गतिविधि रुकुम पश्चिममा १० महिनापछि सुरु भएको छ । सरकारले जारी गरेको लकडाउन र स्वास्थ्य सुरक्षा सतकर्ता अपनाउनु पर्ने भएका कारण जिल्लामा लामो समय जिल्लामा खेल गतिविधि ठप्प थिए । तर १० महिनापछि जिल्ला भलिबल संघले भलिबल संघ कप आयोजना गरेको छ । उक्त प्रतियोगिता आजबाट सदरमुकाम मुसीकोट खलंगाको बह्राटाकुरा स्थित खेल मैदानमा सुरु भएको छ । कर्णाली प्रदेश सभा सदस्य गोपाल शर्मा ‘अनल’ले प्रतियोगिताको उद्घाटन गर्नुभयो । प्रतियोगिता १५ गतेसम्म संचालन हुने आयोजकले जनाएको छ ।
आज उद्घाटन संगै सो म्याच भएकामा भोली देखि प्रतियोगितात्मक खेलहरु संचालन हुने भलिबल संघका अध्यक्ष मोहनकुमार चन्दले जानकारी दिनुभयो । उहाँका अनुसार प्रतियोगितामा सहभागिता जनाउने टिमको टुंगो साँझसम्म लाग्ने छ । विभिन्न ठाउँका २७ वटा टिमले फोन मार्फत नाम टिपाएको र दर्ताका लागि सम्पर्कमा आईरहेकोले सहभागि टिमको टुंगो लाग्न र खेल लिगकम वा नकआउट कुन विधिबाट संचालन गर्ने भन्ने टुंगिएको छैन् ।
प्रतियोगिताको विजेताले नगद ५१ हजार, ट्रफि र मेडल प्राप्त गर्दा उप–विजेताले नगद ३१ हजार सहित ट्रफि र मेडल प्राप्त गर्ने आयोजकको भनाई छ । त्यस्तै तृतिय हुने टिमले नगद २१ हजार, ट्रफि र मेडल प्रदान गरिने छ । स्थान हाँसिल गर्ने सबै खेलाडिलाई मेडलको पनि व्यवस्था गरिएको आयोजकले बताएको छ । त्यस्तै विभिन्न व्यक्तिगत पाँच इभेन्टमा पनि खेलाडि पुरस्कृत हुने छन् । प्रतियोगिताको उत्कृष्ट खेलाडिका साथै उत्कृष्ट स्पाईकर, उत्कृष्ट सर्भर, उत्कृष्ट डिफेण्डर र उत्कृष्ट सेटर घोषणा गरी पुरस्कृत गर्ने आयोजकको तयारी छ ।
प्रतियोगिताको आज एक कार्यक्रमका विच उद्घाटन गरिएको हो । यसैविच कार्यक्रम मार्फत जिल्लाका संस्थापक भलिबल खेलाडिहरुलाई भलिबल संघले दोसल्ला ओढाएर सम्मान समेत गरेको थियो ।
