रुकुम पश्चिमको सदरमुकाम मुसीकोट खलंगामा आयोजित अन्तर पालिका स्तरीय खेलकुद प्रतियोगिता अन्तरगत पुरुष तर्फ पहल गहतराज र महिला तर्फ ऋतु चन्द उत्कृष्ट खेलाडी घोषित भएका छन् । आज भएको फाईनल खेल पश्चात भएको समापन कार्यक्रममा पुरुष तर्फ सानीभेरी गाउँपालिकाका पहल र महिला तर्फ त्रिवेणि गाउँपालिकाकी ऋतु उत्कृष्ट खेलाडीका रुपमा पुरस्कृत भएका हुन् । पुरुष र महिला दुवै तर्फ सानीभेरी गाउँपालिकाले उपाधी जितेको छ । त्रिवेणि गाउँपालिका महिला तर्फ उप विजेता बनेको थियो । उत्कृष्ट खेलाडी बनेका पहल र ऋतुले समान २ हजार ५ सय प्राप्त गरे । 

त्यस्तै चौरजहारीका कमल सुनार र सानीभेरीकी विपना ओली अनुशासित खेलाडी बनेका छन् । पुरुष तर्फ कमल र महिला तर्फ विपना अनुशासित खेलाडी घोषित भएको जिल्ला खेलकुद विकास समितिका कार्यालय प्रमुख छविलाल केसीले जानकारी दिनुभयो । दुवै जनालाई समान २ हजार नगद र मेडलले पुरस्कृत गरिएको छ । कार्तिक १२ गतेबाट सुरु भएको प्रतियोगिता आज समापन गरिएको छ ।