रुकुम पश्चिमको त्रिवेणि गाउँपालिकाले सदरमुकाम मुसीकोट खलंगामा आयोजित अन्तर पालिका स्तरीय खेलकुद प्रतियोगिता अन्तरगत महिला भलिबलमा उप विजेता बन्ने महिला भलिबल टीमलाई सम्मान गरेको छ । आज गाउँ कार्यपालिकाको कार्यालय खारानेटामा बोलाएर खेलाडी तथा अफिसियल टीमलाई सम्मान गरेको हो । फुलमाला र टीका लगाएर खेलाडीहरुलाई सम्मान गरिएको गाउँपालिकाका निमित्त प्रमुख प्रशासकीय अधिकृत रमेश पुनले जानकारी दिनुभयो ।

उहाँका अनुसार गाउँपालिकाले प्रतियोगितामा भाग लिएको गाउँपालिकाको टीमको खर्च व्यवस्थापन समेत गरेको थियो । कार्तिक ११ गतेबाट कार्तिक १५ गतेसम्म सदरमुकाम खलंगाको बराहटाकुरामा भएको प्रतियोगिता अन्तरगत त्रिवेणिको महिला भलिबल टीम फाईनलमा सानीभेरी गाउँपालिकासंग अविश्वसनिय रुपमा पराजित हुन पुगेको थियो । निकै रोमाञ्चक बनेको खेलमा त्रिवेणिले सुरुवाती २ सेट आफ्नो पक्षमा पारिसकेको अवस्थामा पनि हार व्यहोरेको थियो । सानीभेरीले उत्कृष्ट पुनरागमण गर्दै फाईनल खेल जित्दै उपाधीमा कब्जा जमाएको थियो ।