रुकुम पश्चिमको मुसीकोट नगरपालिकाका ३ ठाउँमा आँखा शिविर संचालन हुने भएको छ । आँखा उपचार केन्द्र सल्लेमा संचालन हुन लागेको आँखा अप्रेशन शिविरलाई लक्षित गर्दै नगरका ३ ठाउँमा आँखा शिविर संचालन हुन लागेको मुसीकोट नगरपालिकाले जनाएको छ ।
नगरपालिकाका अनुसार वडा नम्बर ६ मा रहेको प्रयोगशाला सहितको स्वास्थ्य सेवा केन्द्र झुल्खेतमा कार्तिक २९ गते, वडा नम्बर ४ को बालकल्याण मावि सोलावाङमा कार्तिक ३० गते र वडा नम्बर १४ को स्वास्थ्य चौकी छिवाङमा मंसिर ४ गते शिविर संचालन हुने छ । शिविर बिहान ४ देखि अपरान्ह ४ बजेसम्म संचालन हुने छ ।
३ ठाउँमा संचालन हुने शिविरमा नगरवासीको आँखा जाँच हुने नगरपालिकाले जनाएको छ । आँखाको अप्रेशन गर्नुपर्ने खालका बिरामीहरुलाई आँखा उपचार केन्द्र सल्लेमा संचालन हुने २ दिने आँखा अप्रेशन शिविरमा रिफर गरिने मुसीकोट नगरपालिकाका निमित्त प्रमुख प्रशासकीय अधिकृत बिनाराम खड्काले एक सूचना जारी गर्दै जानकारी गराउनुभएको छ ।
मोतियाविन्दु लगायतको समस्या भएर आँखाको अप्रेशन गर्नुपर्ने खालका बिरामीलाई लक्षित गर्दै आँखा उपचार केन्द्र सल्लेमा मंसिर ७ र ८ गते दुई दिन आँखा अप्रेशन शिविर आयोजना गरिएको छ ।
