रुकुम पश्चिमको सानीभेरी गाउँपालिका वडा नम्बर ३ मा खुला पालिका स्तरीय क्रिकेट प्रतियोगिता सुरु भएको छ । बेल्टापु मेलाको अवसरमा खेलकुद विकास समितिले विभिन्न खेलकुद प्रतियोगिता आयोजना गरेको छ । जसअन्तरगत क्रिकेट प्रतियोगिता आजबाट सुरु भएको आयोजकले जनाएको छ । प्रतियोगितामा रुकुम पश्चिम र जाजरकोटका गरेर ६ वटा टीमले सहभागिता जनाएका छन् । आयोजकका अनुसार मुसीकोटका २, सानीभेरीका २ र जाजरकोटका २ टीम रहेका छन् ।  

प्रतियोगिताको विजेताले नगद ४० हजार पुरस्कार प्राप्त गर्ने छ । भने उप विजेताले २० हजार नगद पुरस्कार पाउने छ । जिल्लामा पहिलो पटक पालिका स्तरीय क्रिकेट प्रतियोगिता आयोजना भएको हो । अन्य खेलकुद प्रतियोगिताहरु धमाधम संचालन हुने गरेपनि जिल्लामा क्रिकेट प्रतियोगिताहरु कमै मात्रामा संचालन हुने गरेका छन् । 

अहिले उद्घाटन खेलमा सानीभेरी क्रिकेट क्लब र पिपे जाजरकाेटका विचमा प्रतिस्पर्धा भइरहेकाे छ । जाजरकाेटले पहिला ब्याटिङ गर्दै १ सय ८ रनकाे लक्ष दिएकाे छ । सानीभेरीले जवाफि व्याटिङ गरिरहेकाे छ । 

मेलाको अवसरमा खुला वडा स्तरीय पुरुष र महिला भलिबल तथा पुरुष ब्याडमिन्टन प्रतियोगिता समेत आयोजना गरिएको छ । भलिबल र ब्याडमिन्टनका खेलहरु भोलीबाट सुरु हुने आयोजकले जनाएको छ । आजबाट सुरु भएको मेला तथा खेलकुद कार्यक्रम मंसिर ३ गतेसम्म चल्ने बताईएको छ ।