रुकुम पश्चिमको सानीभेरी गाउँपालिका वडा नम्बर ३ बेल्टापुमा आयोजित खुला पालिका स्तरीय क्रिकेट प्रतियोगिताको उपाधि मुसीकोटले हात पारेको छ । आज भएको फाईनलमा जाजरकोटको भेरी नगरपालिकालाई २ विकेटले पराजित गर्दै मुसीकोटले उपाधि जितेको हो । 

टस जितेर पहिले ब्याटिङ रोजेको भेरी नगरपालिकाले ८३ रनको विजय लक्ष दिएको थियो । जवाफि ब्याटिङ गरेको मुसीकोटले ८ विकेट गुमाएर लक्ष पुरा गर्यो । मुसीकोटको जीतका लागि अर्जुन ददेलले अलराउण्डिङ प्रदर्शन गरे । ३ विकेट लिएका उनले २२ बलमा ३८ रन जोडे । 

उनले यो प्रतियोगितामा उत्कृष्ट पदर्शन गरेका छन् । आफ्नो टीमका लागि महत्वपूर्ण योगदान गर्दै अर्जुनले आफ्नो टीमलाई उपाधि दिलाए । बिजेता बन्नेको मुसीकोटले नगद ४० हजार पुरस्कार पाएको छ । उप विजेता बनेको जाजरकोटको भेरी नगरपालिकाले नगद २० हजारमा चित्त बुझाएको छ । 

खेलकुद विकास समिति सानीभेरी गाउँपालिकाले स्थानीय बेल्टापु मेलाको अवसरमा आयोजना गरेको प्रतियोगितामा रुकुम पश्चिमको मुसीकोट र सानीभेरीका २/२ र जाजरकोटको भेरी नगरपालिकाका २ टीमले प्रतिस्पर्धा गरेका थिए । खेल १२ ओभरको खेलाईएको थियो ।