यहाँकी एक महिलाले चक्कु प्रहार गरी श्रीमानको हत्या गरेकी छिन् । मुसीकोट नगरपालिका ८, किटनीकी ५० वर्षीया डल्ली बुढाले ३९ वर्षीय श्रीमान चित्रबहादुर थापाको हत्या गरेकी हुन् । घरमा एक्लै बस्दै आएका दुई जनाको आपसी विवादपछि चक्कु प्रहार गरि हत्या गरेको प्रहरीले जनाएको छ । डल्लीले आइतबार विहान ४ बजेतिर चक्कु प्रहार गरेको प्रारम्भिक अनुसन्धानबाट खुलेको प्रहरीले जनाएको छ । विहान ४ बजे चक्कु प्रहार गरेर श्रीमानको हत्या गरेपछि बेलुकी ५ बजे डल्ली आफै प्रहरीको सम्पर्कमा आएकी थिइन् । श्रीमानलाई प्रहार गरेको चक्कु सहित जिल्ला प्रहरी कार्यालयमा पुगेपछि मात्रै प्रहरी घटना स्थल गएको थियो ।

आइतबार बेलुकी मात्रै प्रहरी घटना स्थल पुगेको र मुचुल्का उठाएर राती ९ बजेपछि शव जिल्ला अस्पताल ल्याइएको वडाध्यक्ष बुद्धिप्रसाद बुढाले जानकारी दिनुभयो । एकान्तमा रहेको घरमा भएको घटना ढिलो गरी मात्रै थाहा पाइएको वडाध्यक्ष बुढाले बताउनुभयो । स्थानीयका अनुसार श्रीमान श्रीमतीको सधै झै झगडा हुनु गरेको थियो । डल्ली चित्रबहादुरकी कान्छी श्रीमती हुन् । आइतबार विहान उठेपछि नै श्रीमान श्रीमतीबीच सामान्य विवाद भएको र त्यसले उग्र रुप लिएपछि चक्कु प्रहार भएको प्रारम्भिक अनुसन्धानबाट खुलेको प्रहरी नायव उपरीक्षक ठगबहादुर केसीले बताउनुभयो । घटनाको थप अनुसन्धान भइरहेको केसीको भनाई छ ।