नेपाली कांग्रेस रुकुम पश्चिमको नेतृत्व चयनमा ढिलाई भएको छ । अस्ति सातौं जिल्ला अधिवेशन उद्घाटन भएको थियो । तर अहिलेसम्म नेतृत्व चयन हुन सकेको छैन् । सहमतिमै नेतृत्व चयनका लागि अधिकतम प्रयास भइरहेको नेताहरुले बताएका छन् ।
जसका कारण नेतृत्व चयनमा ढिलाई भइरहेको नेताहरुको भनाई छ । हिजो भएको बन्द सत्रले सहमतिमै नेतृत्व चयन गर्नुपर्नेमा जोड दिदैं नेतृत्व चयन गर्ने जिम्मा ४ सदस्यीय कार्यदलाई दिएको थियो । उक्त कार्यदल गोपालजिजंग शाहको संयोजकत्वमा बनेको छ ।
कार्यदलमा सभापतिका आकांक्षी प्रेमप्रकाश ओली र कृष्ण रोकाय सहित मानबहादुर नेपाली सदस्य हुनुहुन्छ । हिजो अवेरसम्म सहमतिको प्रयास भएको र आज पनि बिहानै देखि छलफल चलिरहेको बताईएको छ । चुनाव नहुने लगभग निश्चित भएको र सहमतिका लागि अधिकतम प्रयास भइरहेको एक नेताले बताए ।
जिल्ला सभापतिका लागि वर्तमान सभापति प्रेमप्रकाश ओली र पार्टीका केन्द्रीय नीति, अनुसन्धान तथा प्रशिक्षण प्रतिष्ठान विभागका सदस्य कृष्ण रोकायको तिव्र आकांक्षा छ । रोकायलाई सन्तुष्ट बनाएर ओलीलाई पुनः जिल्ला सभापतिमा दोहोर्याउने गरी सहमति भइरहेको कांग्रेस स्रोतले जनाएको छ ।।
