नेकपा माओवादी केन्द्र रुकुम पश्चिमको मुसीकोट र त्रिवेणि गाउँपालिकाको दोस्रो सम्मेलन उद्घाटन भएको छ । त्रिवेणिको सम्मेलन अर्थमन्त्री समेत रहनुभएका माओवादी केन्द्रका स्थायी कमिटी सदस्य तथा संगठन विभाग प्रमुख जनार्दन शर्मा ‘प्रभावकर’ले उद्घाटन गर्नुभयो ।
मुसीकोटको सम्मेलन भने नेकपा माओवादी केन्द्रका केन्द्रीय सदस्य तथा रुकुम पश्चिम इन्चार्ज बसन्त शर्मा ‘कुशल’ले उद्घाटन गर्नुभएको छ । मुसीकोटको सम्मेलन वडा नम्बर ५ को शेरिगाउँमा रहेको शहीद प्रतिष्ठानको सभाहलमा चलिरहेको छ ।
सम्मेलनबाट निर्वाचित नयाँ नगर कमिटीको पर्सी आईतबार जनार्दन शर्माले मुसीकोटमा घोषणा गर्ने कार्यक्रम रहेको नेकपा माओवादी केन्द्र मुसीकोट नगर कमिटीले जनाएको छ । त्रिवेणिको सम्मेलन वडा नम्बर २ को सिम्रुतुमा जारी छ ।
आजै नेकपा माओवादी केन्द्र सानीभेरी र चौरजहारीको नगर सम्मेलन पनि उद्घाटन हुने कार्यक्रम रहेको छ । दुवै पालिकाको सम्मेलनलाई जनार्दन शर्माले उद्घाटन गर्ने कार्यक्रम रहेको नेकपा माओवादी केन्द्रले जनाएको छ ।
