रुकुम पश्चिम स्थित सानीभेरी नदीमा पुल बनाउने जिम्मा लिएको एक ठेकेदार कम्पनी धागो मात्रै हालेर भाग्ने तयारीमा छ । सानीभेरी गाउँपालिकाको २ र ४ नम्बर वडा जोड्ने गरी सानीभेरी नदीमाथी मोटरेबल पुल निर्माणको ठेक्का लिएको सपना–शैलुङ जेभी काम नगरी भाग्न थालेको छ । फल्लेबगर–मेगा मोटरेबल पुल निर्माण गर्ने भनि उक्त कम्पनीले २०७१ सालमै सडक डिभिजन कार्यालय चौरजहारीसित सम्झौता गरेको थियो । तर सम्झौता भएको ७ वर्ष पूरा भइसक्दा पनि पुल निर्माण त भएन नै पुल निर्माणको सामान्य काम पनि सुरु भएको छैन ।

काम गर्न भनि पछिल्लो पटक ल्याइएका मेशिन फिर्ता लैजाने तयारीमा ठेकेदार कम्पनी छ । मेशिन लैजान भनेर ठेकेदार कम्पनीका मान्छेहरुले तयारी गरेको स्थानीय अपिल पुनले जानकारी दिनुभयो । पुल बनाउनुपर्ने ठाउँमा धागो हालेर मात्रै ठेकेदार कम्पनी भाग्न लागेको उहाँले बताउनुभयो । अब काम गर्न सकिन्न भनेर साइडमा रहेको सामग्री उठाएर लैजाने गरी तयारी गरिएको पुनले बताउनुभयो ।

पुल बनिसक्ने बेला सम्म पुल निर्माणको कार्य नै सुरु नगरी ठेकेदार कम्पनी जान थालेपछि पुल नबन्ने चिन्ता बढेको अर्का स्थानीय सम्झना पुनले बताउनुभयो । झण्डै १३ करोडमा उक्त पुल बनाउने सम्झौता छ । स्थानीयले पुल नबन्ने भयो भनेर नेता तथा सबैतिर हारगुहार गरिरहेका छन् तर कसैले त्यसको सुनुवाई नगरेको गुनासो पनि आइरहेको छ । निर्माणको जिम्मा लिएको उक्त ठेकेदार कम्पनी कालो सूचिमा पर्ने अन्तिम चरणमा छ ।

सोही सूचिबाट हट्नका लागि मात्रै साइडमा केही समय ति मेशिन ल्याइएको स्थानीयले बताएका छन् । लामो समय अलपत्र रहेको यो कार्य सम्पन्न गर्न भन्दै गत दसैं अघि मात्र उक्त मेशिन साइडमा ल्याइएको थियो । सानीभेरी गाउँपालिका अध्यक्ष नरबहादुर पुनले पुल निर्माणका लागि सम्बन्धित ठाउँमा ताकेता गरिरहेको बताउनुभयो । ‘यसमा हामीले पहिल्यैदेखि ताकेता गरिरहेका छौं,’ अध्यक्ष पुनले भन्नुभयो, ‘तय भइसकेको विकासे योजना सम्पन्न हुन्छ भनेर लागिएको छ ।’ ठेकेदारकै लापरबाहीले १८ महिनामा बन्नुपर्ने पुल ७ वर्षसम्म नबनेको अध्यक्ष पुनले बताउनुभयो ।