हाडजोर्नी विशेषज्ञ डाक्टर गोविन्द केसीले रुकुम पश्चिमको जिल्ला अस्पतालमा विरामीको सेवा गर्नुहुने भएको छ । भोली २४ गते शुक्रबारदेखि एक हप्तासम्म उहाँले जिल्ला अस्पतालको ओपिडीमा विरामीको उपचार गर्नुहुने भएको छ । त्यसका लागि डाक्टर केसी आजै जिल्ला आइपुग्नु भएको छ ।

हाडजोर्नि तथा नसा सम्बन्धिका विरामीको उपचार, परामर्शका लागि डाक्टर गोविन्द केसी जिल्ला अस्पताल आइपुगेको र भोलीबाट उपचार थाल्ने जिल्ला अस्पतालका डाक्टर भिमकान्त जैसीले जानकारी दिनुभयो । त्यसका लागि आवश्यक समन्वय र सहजिकरण जिल्ला अस्पतालले गर्ने छ ।

दुर्गममा विरामीको उपचार गर्दै हिड्ने डाक्टर केसी दुई हप्ता रुकुम पूर्व जिल्ला अस्पतालमा उपचार गरेर यहाँ आउनु भएको हो । हाडजोर्नी सम्बन्धिको समस्या भएकालाई उपचारका लागि आउने जिल्ला अस्पतालले आग्रह समेत गरेको छ । यहाँ उपचार गरेपछि सल्यान जिल्ला अस्पताल जाने योजना रहेको डाक्टर केसीले बताउनुभयो ।

आफै औषधी बोकेर, आफ्नै खर्चमा डाक्टर केसी विरामीको उपचारमा हिडिरहनुहुन्छ । नेपालको स्वास्थ्य क्षेत्र सुधारका लागि भन्दै डाक्टर केसीले बेला बेला अनशन गर्ने, सरकारको ध्यानाकर्षण गराउने जस्ता काम पनि गर्दै आउनुभएको छ ।