खास नाम र पहिचान नभएको तर केहीले राई दाइ भनेर चिनिने एक व्यक्ति मृत भेटिएका छन् । जिल्ला प्रहरी कार्यालय रुकुम पश्चिमका अनुसार रुकुम पश्चिमको आठबीसकोट नगरपालिका ६, को त्रिवेणि बजारमा रहेको एक होटलमा अन्दाजी ६०/६१ वर्षीय पुरुष मृत भेटिएका हुन् ।

डोल्पामा काम गर्ने स्थानीयले उनलाई राई दाइ भनेर चिन्ने गरेपनि उनको खास नाम, थर ठेगाना नखुलेको जिल्ला प्रहरी कार्यालयका प्रहरी निरीक्षक डेकेन्द्र शर्माले जानकारी दिनुभयो । लामो समयदेखि काम गर्न बाहिरबाट आएका उनलाई राई दाइ भनेर चिनेपनि खास नाम र ठेगानाका बारे कसैलाई थाहा नभएको पाइएको शर्माले बताउनुभयो ।

मंसिर २१ गते त्रिवेणि आएर एक होटलमा बास बसेको र २३ गते राति मृत अवस्थामा फेला परेको प्रहरीले जनाएको छ । उक्त शव प्रहरीले आवश्यक प्रक्रिया पूरा गरेर पोष्टमार्टम गराइसकेको छ । अब अन्त्यष्टिका लागि आफन्त वा यी व्यक्ति चिन्नेलाई सम्पर्कमा आउन प्रहरी अनुरोध समेत गरेको छ ।