विप्लव नेतृत्वको नेकपा निकट बिद्यार्थी संगठन अखिल क्रान्तिकारी रुकुम पश्चिमले पनि यातायात भाडामा तोकिएको सहुलियत कार्यान्वयनको माग गरेको छ । आज कर्णाली प्रदेशका १० वटै जिल्ला प्रशासन कार्यालयललाई ज्ञापन पत्र बुझाउने कार्यक्रम अनुसार जिल्ला प्रशासन कार्यालय रुकुम  पश्चिममा पनि ज्ञापन पत्र बुझाउदै संगठनले बिद्यार्थी, अपांग र जेष्ठ नागरिकका लागि यातायात भाडादरमा राज्यले दिएको सहुलियतको पूर्ण कार्यान्वयनको माग गरेको हो । 

कार्यान्वयन नभए कडा संघर्षमा उत्रिने संगठनले चेतावनी दिएको छ । नेपाल सरकार र संयुक्त विद्यार्थी संठन बिच भएको सहमतिलाई तत्काल कार्यान्वयन गरि यातायातमा बिद्यार्थीलाई ४५  प्रतिशत र जेष्ठ नागरिक तथा अपांगता भएका व्यक्तिलाई ५० प्रतिशत भाडा तत्काल छुट गर्न अखिल क्रान्तिकारीले माग गरेको छ । 

गुणस्तर हिन र मापदण्ड नाघेका यातायातका साधनको तत्काल अनुगमन गरि त्यस्ता साधन संचालनमा रोक लगाउन पनि संगठनले माग गरेको छ । त्यस्तै दुर्घटनालाई रोक्न तत्काल सडकको बैज्ञानिक स्तरबाट अध्ययन गरि सडक निर्माण तथा मर्मत गर्न समेत संठनको माग छ । 

जिल्ला भित्र रहेका मुख्य सार्वजनिक स्थान बसपार्क, सेमिनार र अन्य स्थानहरुलाई व्यबस्थित र मर्यादित बनाउन, छात्राको आत्मरक्षाका लागि एक विद्यालय एक छात्रा तालिम केन्द्रको व्यवस्था गर्न पनि ज्ञापन पत्र मात्र अखिल क्रान्तिकारीले माग गरेको छ । माग पुरा नभए चरणबद्ध संघर्षमा उत्रिने उसको चेतावनी छ ।