नेपाल कम्युनिष्ट पार्टी माओवादी केन्द्र रुकुम पश्चिम अन्तर्गत बाँफिकोट गाउँपालिका भित्रका जनवर्गिय संगठनले प्रशिक्षण कार्यक्रम सञ्चालन गर्ने भएका छन् । बाँफिकोट गाउँपालिका ४, कोटमा बसेको पार्टी र जनवर्गिय संगठनको सयुंक्त बैठकले सबै जनवर्गिय संगठनको सेल, टोल र वडा, वडामा प्रशिक्षण गर्ने निर्णय गरेको हो ।
अखिल क्रान्तिकारीका गाउँपालिका अध्यक्ष टेकराज रसाइलीले गाउँपालिका पार्टीको आयोजनामा जनवर्गिय संगठनको बैठक बसेको र सबै जवसको प्रशिक्षण गर्ने निर्णय भएको जानकारी दिनुभयो । रसाइलीका अनुसार सेल, टोल र वडा वडामा पुगेर सबै जवसको प्रशिक्षण चलाउने, आवश्यक्ताका आधारमा समिति गठन तथा पुर्नगठनमा लाग्ने गरी निर्णय भएको छ ।
पुस १४ गतेदेखि नै जनवर्गिय संगठनको भेला प्रशिक्षण सुरु गरिने छ । संगठन भएका वडा, टोल, र सेलमा समिति गठन गर्ने निर्णय भएको छ । नभएका जवसका वडा सम्मेलन र पालिका सम्मेलनको तयारीमा जुट्ने निर्णय पनि भएको मगर राष्ट्रिय मुक्ति मोर्चाकी पालिका अध्यक्ष मनकुमारी विष्टले जानकारी दिनुभयो । उहाँ अनुसार अब हरेक दुई महिनाको १ पटक पालिका स्तरीमा जवस र पार्टीको बैठक बस्ने निर्णय पनि भएको छ ।
माओवादी केन्द्रको बाँफिकोट गाउँपालिकाले जनवर्गिय संगठनका भेला, सम्मेलन र प्रशिक्षणमा मुख्य ध्यान लाउने निर्णय गरेको छ । दोस्रो सम्मेलनपछि बसेको पुस ८ गतेको पहिलो गाउँपालिका बैठकले पार्टी जवससम्म पुग्ने, क्रियाशिल बनाउने, गठन र पुर्नगठनमा जोड दिने निर्णय गरेको थियो ।
सोही निर्णय बमोजिम पार्टीले पालिका स्थित सबै जवसका इन्चार्ज, अध्यक्ष र सचिवसँग बैठक गरी आवश्यक कार्यक्रम तय गरिएको माओवादी केन्द्रका अध्यक्ष चन्द्रबहादुर केसीले जानकारी दिनुभयो । पार्टीले सबै जवस, पार्टी सदस्य, शुभचिन्तक, समर्थक, विपक्षी पार्टी सबैतिस एक चरण छलफल चलाउने र अर्को चरणमा थप कार्यक्रम तय गरेर अघि बढाउने तयारीमा रहेको अध्यक्ष केसीले बताउनुभयो ।
बैठकमा पार्टी अध्यक्ष चन्द्रबहादुर केसी उपाध्यक्षहरु नरबहादुर खत्री, झरना शाही, शेरु विक, सचिवालय सदस्य सिता खड्का र दक्ष पुनको पनि उपस्थिति रहेको थियो । माओवादीले यस अघि नै सबै वडामा पार्टी प्रशिक्षण गर्ने गरी निर्णय गरिसकेको छ ।
