झुन्डिएर श्रीमतीको मृत्यु भयो भनेर खबर दिएका दिपक अर्थात दलजित खनालले श्रीमतीको हत्या गरेको स्विकारेका छन् । रुकुम पश्चिमको बाँफिकोट गाउँपालिका ९, झुलाका २५ वर्षीय दिपकले प्रहरी सामु आफूले नै घाँटी थिचेर श्रीमतीको हत्या गरेको सकारेका हुन् ।

जिल्ला प्रहरी कार्यालयका अनुसार २६ वर्षीया कमला खनालको हत्यामा श्रीमान दिपककै हात रहेको पुष्टि भएको अनुसन्धानबाट खुलेको छ । प्रहरीसँगको बयानमा दिपकले दुई जनाबीच वादविवाद बढ्दै जाँदा घाँटी थिचि श्रीमती कमलाको हत्या गरेको बताएका हुन् ।  

गत शुक्रबार राति १० बजेतिर कमला झुण्डिएको अवस्थामा फेला परेकी थिइन् । आफ्नै सलले कमला झुण्डिएको भनेर दिपकले नै अरुलाई खबर गरेका थिए । घटनाको प्रकृति हेर्दा दिपकले घाँटी थिचेर श्रीमतीको हत्या गरी सलले झुन्ड्याइएको पाइएको छ ।

घटना लगत्तै प्रहरी घटना स्थल पुगेर दिपकलाई नियन्त्रणमा लिएको थियो । घरमा दिपक, कमला र उनिहरुको ४ महिनाको छोरा मात्रै थिए । दिपकमाथी थप अनुसन्धान गर्न प्रहरीले आइतबार जिल्ला अदालतबाट १० दिनको म्याद थप गरेको जिल्ला प्रहरी कार्यालयका प्रहरी निरीक्षक डेकेद्र शर्माले जानकारी दिनुभयो । प्रहरी  निरीक्षक शर्माकै नेतृत्वको टोली घटना स्थल पुगेको थियो भने घटना अनुसन्धान पनि यही टोलीले गरिरहेको छ ।