रुकुम पश्चिमको सदरमुकाम खलंगामा दुई जना युवाले मास्क वितरण सुरु गरेका छन् । सुधिरविक्रम शाह र सूर्यप्रकाश शर्माले निःशुल्क मास्क वितरण अभियान थाल्नु भएको हो । पछिल्लो समय कोरोना संक्रमण बढ्दै गएका कारण सचेतना फैलाउन मास्क वितरण थालिएको शाहले बताउनुभयो ।

‘सबैले मास्क लाउन तथा अरु सुरक्षाका उपाय अपनाउन छाडिसकेको अवस्था छ, मान्छेहरु सर्तक होउन र फेरि पनि पहिला जस्तै स्वास्थ्य सुरक्षाका मापदण्ड अपनाउन भनेर मास्क वितरण थालेका हौं,’ शाहले भन्नुभयो । बजारमा विना मास्क हिडिरहेकालाई मास्क वितरण गरिरहेका छन् ।

सुरुमा ५ सय मास्क वितरण गर्ने योजना अनुसार मास्क वितरण थालेको शर्माले जानकारी दिनुभयो । सकेसम्म यो अभियानलाई पछि सम्म लैजाने र अरुलाई पनि जोड्ने योजना रहेको शर्माले बताउनुभयो । उहाँहरुले तपाइको मास्क खोई पर्चा वितरण र टाँग्ने काम पनि गरिरहनु भएको छ ।