रुकुम पूर्वको भूमे गाउँपालिका–४ करालबगरमा ट्याक्टर दुर्घटना हुँदा एक जनाको मृत्यु भएको छ भने ४ जना घाइते भएका छन् । मंगलबार बेलुकी करिब ६ बजेको समयमा भूमे गाउँपालिकादेखि रुकुमकोटतर्फ आइरहेको ट्याक्टर दुर्घटना हुँदा एकको मुत्यु भएको छ भने ४ जना घाइते भएका छन् । 

भूमे–४ करालबगरमा रा १ च ३२४५ नम्बरको ट्याक्टर दुर्घटना हुँदा भूमे–८ का १९ वर्षीय सुनिल रोकाको मृत्यु भएको जिल्ला प्रहरी कार्यालयका प्रहरी निरीक्षक दिपेन्द्र बानियाँले जानकारी दिनुभयो । रुकुमपूर्व अस्पताल रुकुमकोटमा उपचार सम्भव नभपछि थप उपचारको लागि दाङ रिफर गरिएको थियो । गम्भीर घाइते भएका दुई जनालाई थप उपचारको लागि मंगलबार ९हिजो० राति दाङ रिफर गरिएकोमा रोकाको बाटोमै मृत्यु भएको प्रहरीले जनाएको छ ।

भूमे–८ कै १९ वर्षीय सुन्दर रोका दाङमा उपचार भइरहेको प्रहरी निरीक्षक बानियाँले बताउनुभयो । ट्याक्टर चालक सहित ४ जना ट्याक्टर सवार घाइते भएका हुन् । बाँकी तीन जनाको उपचार रुकुमपूर्व अस्पतालमै भइरहेको बानियाँले बताउनुभयो । ट्याक्टर अनियन्त्रित भएर दुर्घटनामा परेको प्रारम्भिक अनुसन्धानबाट खुलेको प्रहरी निरीक्षक बानियाँको भनाइ छ । सडक देखि अन्दाजी ३ सय मिटर तल खसेको थियो ।