प्रेस सेन्टर नेपाल रुकुम पश्चिमले केन्द्रीय अध्यक्ष विष्णु सापकाेटाको उपस्थितिमा विशेष भेला तथा प्रशिक्षण कार्यक्रम सम्पन्न गरेको छ । जिल्ला सदरमुकाम खलंगाको होटल शिशिर वसन्त भ्यूमा कार्यक्रम सम्पन्न भएको हो । कार्यक्रमलाई सम्बोधन गर्दै अध्यक्ष सापकोटाले जनपक्षीय पत्रकारितालाई निरन्तरता दिइरहनु पर्नेमा जोड दिनुभयो ।
प्रेस सेन्टर र यसमा आवद्ध पत्रकारहरुले जनताको पक्षमा, वर्गको पक्षमा र सत्यको पक्षमा वकालत गर्दै कलम चलाउनुपर्ने उहाँले बताउनुभयो । कार्यक्रममा अध्यक्ष सापकोटाले संगठनको स्थापनाको उद्देश्य, आगामी कार्य योजना, नेपालको मिडिया नीति, मिडिया हाउसहरुका बारेमा प्रशिक्षणमुलक मन्तव्य राख्नु भएको थियो ।
कार्यक्रमलाई नेकपा माओवादी केन्द्रका केन्द्रीय सदस्य राजकुमार शर्मा, वसन्तकुमार शर्मा र प्रेस सेन्टरका कर्णाली प्रदेश इन्चार्ज ध्रुवविक्रम बुढाथोकीले पनि सम्बोधन गर्नुभएको थियो । कार्यक्रममा प्रेस सेन्टर जिल्ला समन्वय समितिका अध्यक्ष हरि गौतमले संगठनका सांगठनिक गतिविधिका बारेमा जानकारी गराउनुभएको थियो ।
कार्यक्रममा नेकपा माओवादी केन्द्र रुकुम पश्चिमका संयोजक गोविन्द रोका, कर्णाली प्रदेश सदसय श्रीकुमार कठायत, प्रेस सेन्टरका केन्द्रीय सदस्य मेगराज खड्का, प्रेस सेन्टर मुसीकोट नगर समिति अध्यक्ष दिपेन्द्र महतारा, त्रिवेणि गाउँपालिका अध्यक्ष कुवेर ओली, सानीभेरी गाउँपालिका अध्यक्ष, छविलाल विष्ट र बाँफिकोट गाउँपालिका अध्यक्ष प्रचण्ड खत्री लगायतको आतिथ्यता रहेको थियो । प्रेस सेन्टर रुकुम पश्चिमका उपाध्यक्ष देवकुमार ओलीको स्वागत मन्तव्य रहेको कार्यक्रमको सञ्चालन सचिव नारायण ओलीले गर्नुभएको थियो ।
