नेकपा माओवादी केन्द्र रुकुम पश्चिमले पार्टीका पालिका इन्चार्ज तोकेको छ । जिल्ला सदरमुकाम खलंगामा बसेको प्रथम बैठकले सबै पालिकामा पार्टी इन्चार्ज तोकेको हो । जिल्ला संयोजक गोविन्द रोकाका अनुसार मुसीकोट नगरपालिकामा बुद्धिप्रसाद गौतम, चौरजहारी नगरपालिकामा पुष्प वादी र आठबीसकोट नगरपालिकामा गोर्खबहादुर केसीलाई पार्टीका पालिका इन्चार्ज तोकिएको हो ।

बाँफिकोट गाउँपालिका इन्चार्ज तोकिन बाँकी छ । सानीभेरी गाउँपालिकाको इन्चार्जमा विर्खबहादुर विष्ट र त्रिवेणि गाउँपालिका इन्चार्जमा गणेश केसीलाई तोकिएको छ । अन्य नेताहरुको जिम्मेवारी यथावत रहेको र सबै नेताहरु आ–आफ्नो पालिकामा निर्वाचन केन्द्रीत कार्यक्रममा जुट्ने निर्णय भएको पनि संयोजक रोकाले बताउनुभयो । सम्बन्धित पालिका पार्टिको बैठक बसी निकट भविश्यमा हुने स्थानीय तह निर्वाचन परिचालन समिति गठन गर्ने गरी निर्णय भएको छ । 

बैठकले हरेक पालिकाबाट ३/३ जनालाई जिल्ला समन्वय समितिमा मनोनित गर्ने निर्णय गरेको संयोजक रोकाले जानकारी दिनुभयो । बैठकमा केन्द्रीय सदस्य तथा प्रमुख अतिथि राजकुमार शर्माले समग्र राजनैतिक, सांगठनिक परिस्थितिबारे प्रशिक्षण मन्तव्य राख्नुभयो । उहाँले एकतावद्ध परिचालनमा जोड दिँदै पार्टीका सम्पूर्ण गतिविधिहरुलाई स्थानीय तहको निर्वाचनमा केन्द्रित गर्न निर्देशन दिनुभएको छ । केन्द्रीय सदस्य तथा जिल्ला इञ्चार्ज वसन्त शर्माले आगामी निर्वाचन केन्द्रीत कार्यक्रमबारे विस्तृत चर्चा गर्नुभयो ।

निवर्तमान जिल्ला संयोजक गोपाल शर्माले आगामी स्थानीय निर्वाचनमा पार्टीको श्रेष्ठता कायम हुने गरी एकतावद्ध भएर काममा लाग्न आग्रह गर्नुभयो । बैठकमा केन्द्रीय सदस्यहरु लुम्बिनी गौतम र लक्ष्मी पुन, केन्द्रीय सल्लाहकार मिनबहादुर ओली, नेताहरु  महेन्द्र केसी, कलबहादुर नाथ, गोप्यश्वर केसी, नरबहादुर पुन र मानबहादुर पुन लगायतको विशेष उपस्थिति रहेको थियो ।