रुकुम पश्चिमको मुसीकोट नगरपालिका वडा नम्बर १ सल्लेमा बसले मोटरसाईकललाई ठक्कर दिँदा मोटरसाईकल चालक घाइते भएको छन् । वडा नम्बर १ कै मुलखोलाबाट सल्ले बसपार्क तर्फ गइरहेको बसले खलंगातर्फ आईरहेको मोटरसाईकललाई नेपाल जनजागरण मञ्चको कार्यालय नजिकै ठक्कर दिँदा मोटरसाईकल चालक मुसीकोट १० चुनका श्रीकृष्ण कठायत घाइते हुनुभएको हो ।

बा ५ ख ८४२७ नम्बरको बसले बाग्मती प्रदेश ०२–०३० प ५८९३ नम्बरको मोटरसाईकललाई ठक्कर दिएको जिल्ला प्रहरी कार्यालय रुकुम पश्चिमले जनाएको छ । प्रहरीका अनुसार मोटरसाईकल चालक कठायतको टाउको, हात, कम्मर लगायतका ठाउँमा गहिरो चोट लागेको छ । कठायतको अहिले जिल्ला अस्पतालमा उपचार भइरहेको छ । थप उपचारका लागि नेपालगञ्ज लैजाने तयारी भइरहेको प्रहरीले जनाएको छ । बस चालक सुदर्शन खत्री र बसलाई प्रहरीले नियन्त्रणमा राखेको छ ।