रुकुम पश्चिमको आठबीसकोट नगरपालिकाले तेस्रो राष्ट्रपति रनिङ शिल्ड आजबाट सुरु हुने भएको छ । राडी स्थित ९ नम्बर वडाको बाल कल्याण माध्यामिक विद्यालयमा आज दिउँसो शिल्ड उद्घाटन गर्ने तयारी गरिएको छ । गत पुस २७ गते बसेको ६६ औं नगर कार्यपालिकाको बैठकले गरेको निर्णय अनुसार आजबाट तेस्रो राष्ट्रपति रनिङ शिल्ड हुने भएको हो ।

पहिलो रनिङ शिल्ड ३ नम्बर वडामा गरेको नगरपालिकाले दोस्रो ४ नम्बर वडामा गरेको थियो । राष्ट्रपति रनिङ शिल्ड निर्देशिका २०७० मा उल्लेख भए बमोजिमका सबै खेलकुद समावेश हुने शिक्षा अधिकृत इन्द्रबहादुर विष्टले जानकारी दिनुभयो । विष्टका अनुसार छात्र–छात्रा भलिबल, कबड्डी, एथ्लेटिक्स तर्फका विभिन्न खाले दौड, हाइजम्प, सटफुट, ज्याब्लिङ थ्रो, मार्शल आर्ट लगायतका खेल समावेश गरिनेछ । नगरपालिका भर १७ वटा माध्यामिक विद्यालय छन् ।