रुकुम पश्चिमको आठबीसकोट नगर प्रहरी सहायक निरीक्षक (असई) निरज बिक मोटरसाईकल दुर्घटनामा परि घाइते हुनुभएको छ । बिहिबार नगरपालिकाको वडा नम्बर १० झिन्चौरबाट राडि तर्फ गइरहेको बेला वडा नम्बर ९ को गिँजा भन्ने ठाउँमा राडी तर्फ नै गइरहेको मोटरसाईकलले पछाडिबाट ठक्कर दिँदा बिक घाइते हुनुभएको हो । 

बिक सवार मोटरसाईकललाई पछाडिबाट गइरहेको होमप्रकाश शाह सवार कर्णाली प्रदेश ०२–००१ प ६९५९ नम्बरको मोटरसाईकलले ठक्कर दिदा असई बिकका २ वटा हात भाँचिएको प्रहरीले जनाएको छ । विकको अनुहार सहित शरिरका विभिन्न भागमा समेत चोट लागेको बतार्ईएको छ । 

बिकको नेपालगञ्जमा उपचार भइरहेको छ । आठबीसकोट नगर अस्पतालमा सामान्य उपचार पछि बिकलाई थप उपचारका लागि बिहिबार राति नेपालगञ्ज लगिएको हो । ठक्कर दिने शाहलाई पनि चोट लागेको छ । नगर अस्पतालमा उपचारपछि शाह घरमै आराम गरिरहनुभएको छ । बिहिबार दिउँशो घटना भएको प्रहरीले जनाएको छ ।।