रुकुम पश्चिमको बाँफिकोट गाउँपालिकामा विविध खेलकुद प्रतियोगिता आयोजना गरिएको छ । ५ नम्बर वडाको वडगाउँमा भलिबल, भाले तान्ने, घैंटो फोर लगायतका साँस्कृतिक कार्यक्रम आयोजना गरिएको छ । माघी पर्वको अवसरमा माघे सक्रान्ति तथा खेलकुद महोत्सव आयोजना गरिएको हो । भलिबल प्रतियोगिता उद्घाटन भएको छ ।

प्रतियोगितामा ५ नम्बर वडाका ८ टोलका खेलाडीले सहभागिता जनाएको आयोजक संस्थाका अध्यक्ष प्रेमप्रकाश पुनले जानकारी दिनुभयो । यो वर्ष पुरस्कार स्वरुप एउटा खसी राखिएको छ । विजेता लगायत सबै टिमले उक्त खसी लिएर वनभोज गर्ने कार्यक्रम राखिएको जनाइएको छ । विहीबार वडाध्यक्ष कस्तुपप्रकाश दाहालले प्रतियोगिता उद्घाटन गर्नुभएको थियो । शुक्रबार बाँकी खेलकुद प्रतियोगिता हुने जनाइएको छ ।

शुक्रबार नै खेलामेला लाग्ने नक्कली विहेको कार्यक्रम पनि तय गरिएको छ । वडगाउँमा हरेक वर्ष नक्कली विहे गर्ने चलन छ । यो वर्ष पनि सोही चलन अनुसार वडगाउँका र मग्माका बडगाईँखोला पुगेर नक्कली विहे गराइदिने तयारीमा छन् । वारी र पारीबाट खोलामा जम्मा भएर विहे गराउने गरिएको बालविकास आधारभुत विद्यालय वडगाउँका शिक्षक शुकराम देवकोटाले जानकारी दिनुभयो ।