रुकुम पश्चिमको बाँफिकोट गाउँपालिकाका आठ जना जनप्रतिनिधिहरुले राजीनामा दिएका छन । जनप्रतिनिधिमा दोहोरिनका लागि वडाध्यक्ष, कार्यपालिका सदस्य देखि वडा सदस्यसम्मले राजीनामा दिएका हुन् । राजीनामा दिनेमा ४ जना वडाध्यक्ष, १ जना कार्यपालिका सदस्य र ३ जना वडा सदस्य रहेका छन् । वडा नम्बर ३ का वडाध्यक्ष चन्द्रबहादुर केसी, वडा नम्बर ६ का वडाध्यक्ष मनोजकुमार अधिकारी, वडा नम्बर ७ का वडाध्यक्ष नरबहादुर खत्री र वडा नम्बर ७ का वडाध्यक्ष मनबहादुर केसीले गाउँपालिका अध्यक्ष समक्ष राजीनामा दिनुभएको हो ।

उहाँहरु मध्ये चन्द्रबहादुरलाई नेकपा माओवादी केन्द्रले बाँफिकोट गाउँपालिका अध्यक्षको उम्मेदवार सिफारिस गरेको छ । भने मनोजकुमार, नरबहादुर र मनबहादुरलाई माओवादीले पुनः वडाध्यक्षमा दोहोर्याउने निर्णय गरेको छ । कार्यपालिका सदस्य तारा बुढा केसीलाई भने माओवादीले गाउँपालिका उपाध्यक्षको उम्मेदवार बनाएपछि उहाँले राजीनामा दिनुभएको हो ।

त्यस्तै राजीनामा दिने ३ जना वडा सदस्य मध्य २ जना वडा नम्बर ६ का र वडा नम्बर ४ का १ जना रहेको बाँफिकोट गाउँपालिका अध्यक्ष धर्मबहादुर केसीले जानकारी दिनुभयो । राजीनामा दिने सबै जनप्रतिनिधि माओवादी केन्द्रबाट निर्वाचित भएका हुन् ।