वसन्तकुमार शर्मा बढी कुशल चिरपरिचित हुनुहुन्छ । दश वर्षे जनयुद्धका क्रममा पार्टीले टेक नाम हो कुशल । पार्टीले जनयुद्धमा हिंडेका सबैको टेक नाम दिन्थ्यो । त्यही बेला वसन्तकुमार शर्माले कुशल नाम प्राप्त गर्नुभयो । पार्टी भित्र र बाहिर वसन्त भन्दा धेरै कुशलले चिनिनुहुन्छ उहाँ । नाम जस्तै जिम्मेवारीप्रतिको बोधका साथ उहाँले हरेक जिम्मेवारी कुशलतापुर्वक सम्पन्न गर्दै आउनु भएको छ । ४७ वर्षीय कुशल यस पटक अर्को जिम्मेवारीका लागि अभियानमा हुनुहुन्छ । राजनीतिक सुरु गरेको ३७ वर्षमा पार्टी संगठनको निर्णय अनुसार नै कुशल यस पटक चुनावी अभियानमा हुनुहुन्छ । वैशाख ३० गते हुने स्थानीय तहको निर्वाचनमा नेकपा माओवादी केन्द्रले उहाँलाई मुसीकोट नगर प्रमुखको उम्मेदवारमा अघि सारेको छ । उहाँ चुनाव प्रचार प्रसारमा व्यस्त हुनुहुन्छ । 

६ कक्षा देखि राजनीतिमा
रुँघाको दिव्यचच्छु निमाविमा अध्ययन गर्दै गर्दा उहाँ राजनीतिमा लाग्नुभएको हो । २०४२ सालमा उहाँ कक्षा ६ मा पढ्नुहुन्थ्यो । त्यहिबेला उहाँ विद्यार्थी संगठनमा आवद्ध हुनुभयो । २०४४ सालमा उहाँ त्रिवेणी माध्यामिक विद्यालय सिम्रुतुमा पढ्नुहुन्थ्यो । तत्कालिन अनेरास्ववियूको विद्यालय इकाई अध्यक्ष हुँदादेखि नै उहाँले आफूलाई संगठनको कामकाजमा लगाउनुभयो । २०४५ सालदेखि २०४६ सालसम्म पञ्चाय विरोधी आन्दोलनमा वसन्तको सक्रिय सहभागिता रह्यो । कालो झण्डा देखाउने, पर्चा र पोष्टर टाँस्ने, नाराबाजी र मसाल जुलुसमा सहभागि भएर उहाँले पञ्चायत विरोधी आन्दोलनमा सभागि हुनुभयो । २०४७ सालमा उहाँले नेकपा मोटो मशालको पार्टी सदस्यता प्राप्त गर्नुभयो । २०४८ सालमा अनेरास्ववियूको जिल्ला समिति सदस्य तथा सोही वर्ष नेकपा मशालको यरीय समितिमा रहेर काम गर्नुभयो । २०४९ सालमा विद्यार्थीको जिल्ला सचिव हुनु भएका उहाँ २०५० देखि २०५२ सालसम्म विद्यार्थीको जिल्ला संयोजक भएर उक्त भूमिका कुशलतापूर्वक निर्वाह गर्नुभयो । 

२०५२ सालको माघ २७ गते उहाँ पूर्णकालिन हुनुभयो । माओवादीले थालनी गर्ने जनयुद्धको तयारीका लागि उहाँले घर, परिवार छाड्नुभएको थियो । पूर्णकालिन हुन वित्तिकै उहाँलाई खलंगा यरीको स्वयमसेवक दलको कमाण्डरको जिम्मेवारी पार्टीले दिएको थियो । त्यतिबेला मसाल जुलुस गर्ने, माइकिङ, गर्ने, पर्चा र पोष्टरिङ गर्ने जिम्मा उहाँकै थियो । सदरमुकाम क्षेत्रमा उहाँले यो भूमिका पनि कुशलतापूर्वक नै निर्वाह गनुभयो । २०५३ सालमा उहाँलाई पार्टीले जिल्ला समिति सदस्य बनायो । त्यतिबेला उहाँले बाँफिकोट यरीया इन्चार्ज र छामार दलको कमिसार भएर पनि काम गर्नुभयो । त्यतिबेलाका पार्टीका सम्पूर्ण कामकारबाही पनि उहाँले पूर्ण सफलता हाँसिल गर्नुभयो ।

२०५६ सालमा माओवादीले भारतमा पार्टीको दोस्रो राष्ट्रिय सम्मेलन भयो । २०५७ सालमा उहाँलाई पार्टीले रुकुम जिला सेक्रेटरीको जिम्मेवारी दियो । रुकुम जिल्लाको सेक्रेटरीको जिम्मेवारी कुशलतापूर्व निर्वाह गरेका वसन्त २०५८ मा जिल्ला इन्चार्ज हुनुभयो । २०५९ मा उहाँलाई पार्टीले विशेष जिल्ला इन्चार्जमा खटायो । जनयुद्धका क्रममा माओवादीले रोल्पा र रुकुमका केही गाविस मिसाएर विशेष जिल्ला घोषणा गरेको थियो । २ वर्ष त्यसको इन्चार्जसिप गरेको वसन्त २०६१ सालमा गण्डक क्षेत्रमा सरुवा भएर जानुभयो । गण्डक क्षेत्रको पाल्पा इन्चार्ज भएर काम गर्नुभएका २०६२ मा अर्घाखाँची जिल्लाको इन्चार्ज हुनुभयो । २०६४ सालदेखि २०७४ सालसम्म उहाँ फेरि पाल्पा इन्चार्ज हुनुभयो । २०६९ सालदेखि पार्टीको केन्द्रीय सदस्य हुनु भएका उहाँ हालसम्म पनि पार्टीको केन्द्रीय सदस्य हुनुहुन्छ । उहाँ पछिल्लो समय रुकुम पश्चिम जिल्लाको इन्चार्ज भएर खटिरहनु भएको छ । 

व्यवस्था विरोधी चेत
सानै उमेरमा समाजमा भइरहेको थिचोमिचो बुझेका वसन्तले त्यसको प्रतिवाद गर्नु थाल्नुभएको थियो । पढ्दै गर्दा पञ्चायती व्यवस्था जनताको व्यवस्था होइन भनेर उहाँले बुझ्नुभयो । त्यही बुझाईका आधारमा उहाँमा पलाएको विद्रोही चेतले संगठनमा आवद्ध हुने वातावरण बन्यो । आफूलाई पढाउने जितबहादुर शाह लगायतका शिक्षकहरुको स्कुलिङले पनि संगठनमा बढी आकर्षण गरेको बुझाई उहाँको छ । पञ्चायती व्यवस्थामा जनताले व्यहोरेको सास्ती, दुःख र विभेद अन्त्यका लागि विद्रोह नै विकल्प बुझेका वसन्त अन्तत जनता, देशका लागि विद्रोह गरेर जनयुद्धमा होमिनुभएको थियो । २०४२ सालदेखि नै उहाँ निरन्तर विना कुनै स्वार्थ राजनीति सेवामा हुनुहुन्छ । केही पाउने भन्दा पनि व्यवस्था बदल्नका लागि भित्रैबाट पलाएको चेतले सेवामै रहनका लागि प्रेरणा पाइएको शर्माले बताउनुभयो । ‘यो बेलासम्म केही पाउन र लिनका लागि केही गरिएन,’ उहाँले भन्नुभयो, ‘पार्टीले दिएको जिम्मेवारीमै रहेर काम गर्दै आएको कुरा सर्वत्र सबैलाई थाहा नै छ ।’

संविधान र संघीयताको संस्थागत विकास
उहाँलाई माओवादीले मुसीकोट नगरप्रमुखको उम्मेदवार बनाएको छ । यसमा पार्टीको सर्वसम्मत निर्णयको सम्मान गर्दै उहाँ चुनाव लक्षित प्रचार प्रसारमा व्यस्त हुनुहुन्छ । ‘पार्टीले गरेको निर्णयका कारण म पार्टीका पक्षमा मत माग्न हिडिरहेको छु, भेटघाट, छलफल जारी छ,’ उहाँले भन्नुभयो, ‘चुनावी अभियानबाट जनता, मतदाता उत्साहित पाएको छु, हाम्रो पार्टी पनि उत्साहित नै छ ।’ उहाँले माओवादी र माओवादीले सञ्चालन गरेको जनयुद्धको जगमा बनेको संघीयताको संस्थागत विकास, भौतिक पूर्वाधार र अरु मानविय विकासका लागि विभिन्न योजना अघि सारेर अघि बढेको बताउनुभयो । आफ्नो उम्मेदवारी प्राप्त उपलब्धिको संस्थागत विकास, भौतिक पूर्वाधार, मानविय विकासमा जोड, आर्थिक समृद्धिका लागि भएको बताउनुभयो । आर्थिक समृद्धि तथा सामाजिक साँस्कृतिक रुपान्तरण अभियान लक्षित चुनावी प्रचार प्रसार भइरहेको उहाँले बताउनुभयो ।

सबैलाई आर्थिक समृद्धिमा लैजानका लागि आर्थिक स्रोत व्यवस्थापनका लागि पार्टीले अघि सारेको योजना सहित पार्टीका अरु सबै उम्मेदवार सहित आफू पनि प्रचारमा रहेको उहाँको भनाई छ । ५ वर्षसम्म नगरपालिकाले खडा गरेको जगलाई थप व्यवस्थित गर्ने योजना आफूहरुसित रहेकैले पनि माओवादी सहित गठबन्धनको विकल्प नभएको शर्माले बताउनुभयो । ‘हाम्रै पार्टीको नेतृत्वको टोलीले नगरपालिकाको विकासमा पहिलो ५ वर्षमा आधारभुत काम गरिसकेको छ, अब यसलाई बढाउनु छ, दिगो बनाउनु छ यसैले पनि माओवादीको विकल्प छैन,’ शर्माले भन्नुभयो, ‘मतदाताको उत्साहबाट त्यो प्रष्ट भइसकेको छ ।’ स्थानीय स्रोत साधनका साथ प्रदेश संघ सरकारसँगको विशेष सहयोगमा नगरलाई उत्कृष्ठ र नमूना बनाउने काममा आफूले कुनै कसर बाँकी नराख्ने र त्यसको आधार स्वरुप घोषणा पत्र बनाएर प्रचारमा हिडेका वसन्तले बताउनुभयो ।