रुकुम पश्चिममा निर्वाचनलाई लक्षित गरेर मदिरा विक्रि वितरण तथा सेवनमा रोक लगाईएको छ । जाँड रक्सी लगायत मदिराजन्य पदार्थ सेवन गरेर शान्ति सुव्यवस्थामा खलल पार्न सक्ने सम्भावनालाई मध्य नजर गर्दै जिल्ला प्रशासन कार्यालयले भोली देखि लागु हुने गरी जिल्लामा मदिरा सेवन तथा विक्रि वितरणमा पूर्ण प्रतिबन्ध लगाएको हो । 

यो नियम निर्वाचन अवधिभर लागु हुने प्रमुख जिल्ला अधिकारी परमानन्द घिमिरेले जानकारी दिनुभयो । आज बसेको जिल्ला सुरक्षा समितिको बैठकले मदिरामा पूर्ण प्रतिबन्द्ध लगाउने र नियम विपरित गएर मदिरा सेवन तथा विक्रि वितरण गरेको पाईएमा नियम अनुसार कारवाही गर्ने चेतावनी दिएको छ । 

साथै जिल्लाका उद्योगी, व्यवसायी र सर्वसाधारणलाई निर्वाचन अवधिभर मदिराको उत्पादन, भण्डारण, विक्रि वितरण नगर्न आग्रह गरिएको छ ।

त्यस्तै आँफुखुशी सवारी साधन प्रयोग नगर्न पनि जिल्ला प्रशासन कार्यालयले राजनीतिक दल तथा उम्मेदवारहरुलाई सचेत बनाएको छ । सवारी साधनको प्रयोग गर्नुअघि राजनीतिक दल वा दलको प्रतिनिधिले त्यस्तो सवारी साधन प्रयोग गर्न सम्बन्धित निर्वाचन अधिकृतबाट अनुमति लिनुपर्ने व्यवस्था रहेको स्मरण गराउँदै नियमानुसार गर्न जिल्ला प्रशासन कार्यालयले आग्रह गरेको हो । आधारसंहिता विपरित गएको पाईएमा कानून वमोजिम कारवाही हुने प्रशासनले चेतावनी दिएको छ ।।