रुकुम पश्चिमका राजनीतिक दलहरुले विहान ८ बजेदेखि बेलुका ७ बजेसम्म मात्रै चुनावी प्रचार प्रसार गर्नुपर्ने भएको छ । मुख्य निर्वाचन अधिकृतको कार्यालयमा बसेको सर्वदलिय सर्वपक्षीय बैठकले यस्तो निर्णय गरेको हो । विहान ८ बजेदेखि बेलुका ७ बजेसम्म तथा निर्वाचन आचार संहिताले तोकेको समय भन्दा अघि पछि प्रचार प्रसार गरेको पाइएमा कानूनी कारबाहीका लागि राजनीतिक दलहरु सहमत भएका छन् ।

बैठकमा सहभागि राजनीतिक दलले निर्वाचन आचारसंहिता पूर्ण पालनको प्रतिबद्धता गरेका छन् । निर्वाचनको प्रचार प्रसारको सन्दर्भमा मुख्य निर्वाचन अधिकृतको कार्यालयबाट स्वीकृत लिएका सवारी साधन मात्रै सञ्चालन गर्ने र यदी स्वीकृत नलिएको भए स्थानीय प्रशासनले नियन्त्रणमा लिने निर्णय पनि आजको बैठकले गरेको छ ।

निर्वाचनलाई जिम्मेवार, भयरहित र शान्तिपूर्ण वातावरणमा सम्पन्न गराउनका लागि राजनीतिक दल, तिनका उम्मेदवारले कार्यकर्तालाई संयमित हुन आग्रह गर्ने र उत्तेजित हुने वातावरण हुन नदिनेतर्फ ध्यान दिनुपर्ने निष्कर्ष पनि बैठकले निकालेको छ । निर्वाचनको समयभर मदिरा विक्री वितरणमा रोक लाउने जिल्ला प्रशासन कार्यालयको निर्णयको स्वागत गर्दै त्यसलाई कार्यान्वयनमा सबै दलले भूमिका निर्वाह गर्ने निर्णय भएको माओवादी केन्द्रका जिल्ला संयोजक गोविन्द रोकाले जानकारी दिनुभयो ।