वैशाख ३० गतेको स्थानीय तह निर्वाचन नजिकिदै छ । मतदानाको दिन नजिकिदै जाँदा झडप, विवाद, हानाहान गरेका खबर आइरहेका छन् । विशेष गरी विपक्षी पार्टीबीच यस्तो भइरहेको घटना सार्वजनिक भइरहेका हुन् । रुकुम पश्चिमका केही वडामा त्यस्तो भएपनि जिल्लाको एउटा वडा यस्तो छ, जहाँ एक अर्काले अंकमाल गरेर भोट मागिरहेका छन् ।

प्रचार प्रसार गरिरहेका छन् । मुसीकोट नगरपालिका १३ नम्बर वडाको प्रचार प्रसार कार्यक्रम सहवार्द र शान्त छ । नेकपा माओवादी केन्द्र र नेपाली कांग्रेसबाट मात्रै उक्त वडामा वडाध्यक्षका उम्मेदवारी परेको छ । दुवै जना उम्मेदवार आआफ्नो टिम सहित प्रचार प्रसारमा छन् । प्रचार प्रसारको क्रममा सँगै भेटिन्छन् । कुरा गर्छन् । अंगालो हाल्छन् । सहवार्दता विग्रेको छैन । यसबाट कार्यकर्ता पनि खुसी छन् । मतदाता झन खुसी नहुने कुरै भएन । उम्मेदवारहरु स्वस्थ प्रतिस्प्रधामा छन् ।

माओवादी केन्द्रबाट खलबहादुर खड्का उम्मेदवार हुनुहुन्छ भने नेपाली कांग्रेसबाट नवराज गिरीले टिकट ल्याएर प्रचार प्रसारमा हुनुहुन्छ । गिरीको टिमलाई नेकपा एमालेले पनि समर्थन गरेको छ । खड्का आफ्नो पार्टीको मात्रै टिमबाट प्रतिसप्रधा गरिरहनु भएको छ । खड्काले लालसलाम गर्नुहुन्छ, गिरीले जय नेपाल भन्नुहुन्छ ।

दुवैले एक अर्कालाई सम्मान गरिरहनु भएको छ । ‘जसले मतदातालाई रुचाउँछन् उसैले जित्ने हो त्यसैले हामीबीच त्यस्तो कुनै तिक्तता छैन मिलेरै प्रचार प्रसार गरिरहेका छौं,’ खड्काले भन्नुभयो, ‘वडाको निर्वाचन हो यसमा धेरै असजिलो मान्नुपर्ने कारण छैन ।’ खुला रुपमा एजेण्डा दिएर, विकास हेरेर रुचेका उम्मेदवारलाई भोट गर्नु भनेर भनिएको उहाँले बताउनुभयो ।

यसैले हानमार गर्नुपर्ने, कुटपिट गनुपर्ने अवस्था नरहेको खड्काको भनाई छ । गिरीले पनि संयम भएर प्रचार प्रसार गरिरहेको बताउनुभयो । ‘निर्वाचन एउटा प्रक्रिया हो र यो प्रक्रिया सकिएपछि फेरि आआफ्नै काममा जोडिनुपर्ने थाहा छ यसैले यो वा त्यो भनेर लफडा गर्न जरुरी छैन गरिएको छैन र गरिन्न पनि,’ उहाँले भन्नुभयो ।