रुकुम पश्चिमको मुसीकोट नगरपालिका वडा नम्बर २ मा नेकपा माओवादी केन्द्रले र्याली निकालेको छ । चुनावी प्रचार प्रसार अन्तरगत वडाको खालीगैरा देखि सुरु भएको र्याली वडाका प्रत्येक टोललाई परिक्रमा गरेर राउखेतमा गएर कोणसभामा परिणत भएको थियो । 

कोणसभालाई नेकपा माओवादी केन्द्रका विशेष प्रदेश समिति सदस्य ओपेन्द्र शर्मा र वडा अध्यक्षका उम्मेदवार दलबहादुर खड्काले सम्बोधन गर्नुभएको थियो । सभालाई सम्बोधन गर्दै नेता शर्माले अव निर्वाचनको दिन आउँन थोरै दिन बाँकी रहेको र नेकपा माओवादी केन्द्रका उम्मेदवारलाई विजयी गराउन वडावासीलाई आग्रह गर्नुभयो । 

त्यस्तै वडाअध्यक्षका उम्मेदवार खड्काले २ नम्बर वडावासीले आफुलाई विजयी गराउनेमा विश्वास व्यक्त गर्नुभयो । अहिलेसम्मको प्रचारका क्रममा देखाएको मायालाई मतपत्रमा देखाउन उहाँले आग्रह गर्नुभयो । कार्यक्रममा नेकपा माओवादी केन्द्रका कर्णाली प्रदेश सदस्य गोप्यस्वर केसी, मुसीकोट २ का संस्थापक सदस्य भलुसिङ खड्का लगायतको उपस्थिति रहेको थियो ।