सहिद स्मृति नगर अस्पताल खोलागाउँको सेवा थप भएको छ । चौरजहारी नगरपालिका, १० मा रहेको उक्त अस्पतालले विभिन्न सेवा थप गरेको हो । चौरजहारी नगर स्वास्थ्य सह संयोजक डण्ड शर्माले डिजिटल एक्सरे, एनालाइजर मेशिन, भिडियो एक्सरे सेवा थप गरिएको जानकारी दिनुभयो । गत कार्तिक १४ गते अस्पताल उद्घाटन भएको थियो । उक्त अस्पतालले त्यसयता विरामी चेकजाँच सेवा, विरामी भर्ना सेवा, आकष्मिक सेवा, प्रसुती सेवा, प्रयोगशाला सेवा प्रदान गर्दै आएको छ ।

फार्मेसी सेवा, बाल स्वास्थ्य सेवा लगायतका सेवा प्रवाह गर्दै आएको छ । नगरपालिकाले भवन बनाएर अस्पताल उद्घाटन गरेको थियो । अस्पतालका सेवा थपिएपछि सर्वसाधारणलाई सजिलो सह संयोजक शर्माले बताउनुभयो । अस्पतालमा नगरपालिकाका ५, ६, १०, ११, १२, १३, १४ नम्बर वडाका साथै सल्यानको दार्मा र कुमाख गाउँपालिकाका केही सर्वसाधारण पनि उपचारका विरामीहरु आउने गरेका छन् । अस्पतालमा एक जना मेडिकल अधिकृत सहितका स्वास्थ्यकर्मी कार्यरत छन् । अस्पताल उद्घाटन यता अस्पतालमा ४ हजार बढी विरामीको उपचार भएको छ ।