साँखमा आयोजित भलिबलको उपाधि बागलुङ निसिखोलालाईपरम्परागत पापिनी भेलाको अवसरमा रुकुम पश्चिमको मुसीकोट नगरपालिका–७, साँखमा आयोजित पुरुष खुला वडा स्तरीय भलिबलको उपाधि बागलुङ निसिखोलाले जितेको छ । आज भएको फाईनलमा रुकुम पश्चिमको त्रिवेणि गाउँपालिका–८, लाई ३–० को सोझो सेटमा पराजित गर्दै निसिखोला गाउँपालिका–२, ले उपाधि हात पारेको हो । निसिखोलाले खेलको पहिलो र दोस्रो सेट समान २० का विरुद्ध २५ ले र तेस्रो सेट १८ का विरुद्ध २५ ले आफ्नो हातमा पार्दै नगद ५१ हजार सहित कप जित्न सफल भयो ।

फाईनलमा पराजित भएको त्रिवेणि ८, उप–विजेता बनेको छ । उसले नगद २६ हजार र ट्रफि हात पार्दा तेस्रो भएको रुकुम पूर्वको सिस्ने गाउँपालिका–८, ले नगद १६ हजार र ट्रफि प्राप्त गरेको आयोजक ठुली दह युवा क्लवले जनाएको छ । आजै तेस्रो स्थानका लागि भएको खेलमा सानीभेरी गाउँपालिका–३, लाई ३–१ को सेटमा पराजित गर्दै सिस्ने ८ तेस्रो भएको हो । प्रतियोगितामा रुकुम पश्चिम सहित, रुकुम पूर्व, रोल्पा, बागलुङका विभिन्न १९ वटा वडा स्तरीय टिमले सहभागिता जनाएका थिए ।