रुकुम पश्चिममा एउटा मतदान केन्द्र महिलाले मात्र संचालन गर्दै छन् । जिल्लाको मुसीकोट नगरपालिका वडा नम्बर ५ मा रहेको यमुना नन्द नमूना माध्यमिक विद्यालयलमा रहेको मतदान स्थलको ख मतदान केन्द्रमा सबै महिला कर्मचारीहरु छन् । 

उक्त मतदान केन्द्रमा पाँचै जना महिला कर्मचारी खटिएको जिल्ला निर्वाचन अधिकारी कुमारी रिमा मल्लले जानकारी दिनुभयो । उक्त मतदान केन्द्रको मतदान अधिकृतमा भावना शाह रहनुभएको छ । 

सहायक मतदान अधिकृतमा सुमित्रा केसी पुन, सहायक कर्मचारीमा विमला बुढामगर र जुना शाह केसी तथा कार्यालय सहयोगिका रुपमा मनिषा केसी खटिएको जिल्ला निर्वाचन अधिकारी मल्लले बताउनुभयो । 

जिल्लाका कुल १ सय ३९ मतदान केन्द्र मध्येमा एउटा केन्द्र मात्र महिलाहरुले संचालन गर्न लागेका हुन् । यसवाहेक धेरै मतदान केन्द्रको नेतृत्व महिलाले गरेपनि पुरै महिला कर्मचारी खटिएको यो जिल्लाको एक मात्र मतदान केन्द्र हो ।