रुकुम पश्चिमको त्रिवेणी गाउँपालिका नेकपा माओवादी केन्द्रले जितेको छ । वडा नम्बर २ को गणना सकिएसंगै गाउँपालिकाको अन्तिम मत परिणाम आएको हो । नेपाली कांग्रेसका अमरसिंह खड्कालाई ८ सय ३६ को मतान्तरले पराजित गर्दै नेकपा माओवादी केन्द्रका गणेशकुमार केसी विजयी हुनुभयो । केसीले ५ हजार १ सय २९ मत प्राप्त गर्नुभयो । खड्काले भने ४ हजार २ सय ९३ मत पाउनुभयो । 

त्यस्तै उपाध्यक्षमा पनि माओवादी केन्द्रकी राजकुमारी रेउले विजयी हुनुभएको छ । उहाँले नेपाली कांग्रेसकी सृष्टि बाँठालाई ८ सय ३० मतान्तरले पराजित गर्नुभयो । रेउलेले ५ हजार १ सय ४३ मत पाउँदा बाँठाले ४ हजार ३ सय १३ मत पाउनुभयो । गाउँपालिकाका १० वडा मध्येमा प्रमुख र उप प्रमुख जितेको माओवादीले ५ वडामा जित हाँसिल गर्यो भने कांग्रेसले ४ वडा जित्यो । 

कांग्रेसले यसअघि २०७४ सालमा गाउँपालिकाका २ वडा जितेको थियो । त्यतिबेला जितेका दुवै वडा गुमाएर माओवादीले जितेका ४ वडामा यो पटक कांग्रेस विजयी भएको हो । कांग्रेसले यो पटक केही वडामा एमालेसंग गठनबन्धन गरेको थियो । ११ मध्ये एउटा वडा भने स्वतन्त्र उम्मेदवारले जिते ।