रुकुम पश्चिमको मुसीकोट नगरपालिकामा मत गणना रोकिएको छ । वडा नम्बर १४ को मतगणना सुरु हुन सकेको छैन् । मतगणनाको तयारी चल्दै गर्दै मतपत्रमा विभिन्न तरिकाले संकेत गरेको पाईएपछि विवाद सृजना भएको हो । विहानैबाट मतगणना सुरु हुनुपर्नेमा अहिलेसम्म पनि गणना सुरु हुन सकेको छैन् । अहिले छलफल चलिरहेको मुख्य निर्वाचन अधिकृत विद्याराज पौडेलले जानकारी दिनुभयो । कस्तो खालको मत संकेत हो भन्ने बारेमा भने खुलाईएको छैन् ।

मतपत्र संगै कागजका टुक्रा भेटिएको बताईएको छ । यो वडा मत गणना गर्न बाँकी अन्तिम वडा हो भने निर्णायक पनि । यो वडाबाट नै जीत हारको फैसला हुने छ । नगरपालिकाका कुल १४ वडा मध्यमा १३ वटा वडाको मत गणना सकिदा सम्म प्रमुखमा नेकपा माओवादी केन्द्रका वसन्तकुमार शर्मा र उप प्रमुखमा नेकपामा एकीकृत समाजवादीका विमलकुमार पुनले अग्रता लिनुभएको छ ।

वडा नम्बर १ देखि नै प्रमुखमा नेपाली कांग्रेसका महेन्द्र केसी र उप प्रमुखमा नेकपा एमालेका थलविर ओलीसंग पछाडि परेका शर्मा र पुनले वडा नम्बर १२ देखि अग्रता लिनुभएको हो । अहिले प्रमुखमा शर्मा केसी भन्दा १ सय ८० र उप प्रमुखमा पुन ओली भन्दा ३ सय ६४ मतले अगाडी देखिनुभएको छ । मुसीकोटमा कांग्रेस र एमालेले गठबन्धन गरेका छन् भने माओवादी केन्द्र र एकीकृत समाजवादी पार्टीले गठबन्धन गरेका छन् । यो गठबन्धनलाई जसपाले पनि सघाएको छ ।