मत संकेत गरेको पाईएपछि विवाद हुँदा मुसीकोट नरपालिकामा रोकिएको मत गणना सुरु भएको छ । वडा नम्बर १४ को मत गणना सुरु गर्ने क्रममा केही मतमा संकेत गरेको पाईएको थियो । त्यसपछि विवाद सृजना हुँदा ८ घण्टा भन्दा लामो समयसम्म मतगणना रोकिन पुगेका थियो । तर अन्तत मत संकेत गरिएका ४४ वडा मत पूर्ण बदर गर्ने सहमति अनुसार गणना सुरु भएको हो ।

यस वडामा १ हजार २ सय ७५ मत खसेको थियो । तर अव भने १ हजार २ सय ३१ मत कायम भएको छ ।हालसम्मको मत परिणाम अनुसार प्रमुखमा नेकपा माओवादी केन्द्रका वसन्तकुमार शर्मा र उप प्रमुखका विमलकुमार पुनले अग्रता लिनुभएको छ । वडा नम्बर १ देखि नै प्रमुखमा नेपाली कांग्रेसका महेन्द्र केसी र उप प्रमुखमा नेकपा एमालेका थलविर ओलीसंग पछाडि परेका शर्मा र पुनले वडा नम्बर १२ देखि अग्रता लिनुभएको हो ।

अहिले प्रमुखमा शर्मा केसी भन्दा १ सय ८० र उप प्रमुखमा पुन ओली भन्दा ३ सय ६४ मतले अगाडी देखिनुभएको छ । मुसीकोटमा कांग्रेस र एमालेले गठबन्धन गरेका छन् भने माओवादी केन्द्र र एकीकृत समाजवादी पार्टीले गठबन्धन गरेका छन् । यो गठबन्धनलाई जसपाले पनि सघाएको छ ।