रुकुम पश्चिमको मुसीकोट नगरपालिकाको प्रमुखमा नेपाली कांग्रेस विजयी भएको छ । गत स्थानीय तहको निर्वाचनमा नेकपा माओवादीले जितेको थियो । माओवादी केन्द्रका वसन्तकुमार शर्मालाई १३ मतको झिनो अन्तरले पराजित गर्दै महेन्द्र केसी नगर प्रमुखमा निर्वाचित हुनुभयो । केसीले ६ हजार ९ सय १४ मत प्राप्त गर्नुभयो । शर्माले ६ हजार ९ सय १ मत पाउनुभयो ।

केसी गत स्थानीय तहको निर्वाचनमा पनि नेपाली कांग्रेसबाट नगर प्रमुखको चुनाव लड्नुभएको थियो । त्यसबेला नेकपा माओवादी केन्द्रका देविलाल गौतमसंग १ सय ७४ मतले पराजित हुनुभएका केसी यो पटक भने झिनो अन्तरले विजयी हुन सफल हुनुभएको छ । उप प्रमुखमा भने नेकपा एकीकृत समाजवादीका विमलकुमार पुन विजयी हुनुभएको छ ।

नेकपा एमालेका थलविर ओलीलाई १ सय ५५ मतले पराजित गर्नुभयो । पुनले ६ हजार १ सय ४० मत पाउँदा ओलीले ५ हजार ९ सय ८५ मत पाउनुभएको छ । मुसीकोटमा नेपाली कांग्रेस र एमालेले गठबन्धन गरेका थिए भने माओवादी केन्द्र र नेकपा एसले गठबन्धन गरेका थिए । नगरका कुल १४ वडा मध्यमा माओवादीले ८ र कांग्रेसले ६ वटा वडा जितेका छन् ।