२०७९ वैशाख ३० गते भएको स्थानीय तह  निर्वाचनमा प्रमुख तथा अध्यक्ष पदमा महिलाको सहभागी शून्य देखिएको छ । रुकुम पश्चिमका ६ वटा स्थानीय तह भए पनि  महिला  प्रमुख तथा अध्यक्ष  पदमा महिलाको सहभागिता हुन सकेन । पहिलो पटक २०७४ सालमा भएको स्थानीय तहको निर्वाचनमा पनि प्रमुख तथा अध्यक्ष  पदमा महिलाको सहभागी भएको थिएन ।  

प्रमुख तथा अध्यक्ष पदमा महिलाले कुनै पालिकामा पनि उम्मेदवारी नदिएपछि स्थानीय तह निर्वाचनमा पालिका प्रमुख तथा अध्यक्षमा  महिलाको सहभागीता भएको थिएन । पालिका उप प्रमुख तथा उपाध्यक्षमा भने ५  वटा पालिकामा स्थानीय तहको निर्वाचनमा महिला निर्वाचित  भएका छन्  ।  चौरजहारी नगरपालिकाको उपप्रमुखमा मा इश्वरीकुमारी शर्मा विएम,  आठबीसकोट नगरपालिका उपप्रमुखमा धनकुमारी शाही, सानीभेरी गाउँपालिकामा कमला रोका पुन, बाँफिकोट गाउँपालिकामा तारा बुढा केसी,  त्रिवेणी गाउँपालिकामा राजकुमारी रेउले निर्वाचित भएका छन् ।

यी ५ वटै स्थानीय तहमा  निर्वाचित भएका उप प्रमुख तथा उपाध्यक्ष माओवादी केन्द्रबाट उम्मेदवार बनेका थिए । जिल्ला सदरमुकाम समेत रहेको  मुसिकोट नगरपालिकाको उपप्रमुखमा भने माओवादी केन्द्र र एकीकृत नेकपा समाजवादीको गठबन्धनबाट विमलकुमार पुन निर्वाचित हुनुभएको छ । मुसीकोटमा एमालेको तर्फबाट अन्जना चन्द गौतम, चौरजहारीमा डण्डी कार्कीले प्रमुखमा उम्मेदवारी दिएपनि नाम फिर्ता लिइएको थियो । आठबीसकोटको नगरप्रमुखमा  एमालेको तर्फबाट कृष्णाकुमारी मल्लको उम्मेदवारी कायमै भएपनि एमाले कांग्रेस गठबन्धनका कारण मल्लको पक्षमा मत आएन ।