नेपाल कम्युनिष्ट पार्टी माओवादी केन्द्र मुसीकोट नगरपालिका ६ नम्बर वडा रुकुम पश्चिमले मतदातालाई धन्यवाद ज्ञापन गरेको छ । वैशाख ३० गते भएको स्थानीय तहको दोस्रो निर्वाचनमा आफ्नो पार्टी र पार्टीका उम्मेदवारलाई मतदान गरी निर्वाचित गराउने वडाका सम्पूर्ण मतदातालाई पार्टीले धन्यवाद ज्ञापन गरेको हो ।

पार्टीका वडा सचिव दिपेन्द्र महताराले एक विज्ञप्ती जारी गर्दै निर्वाचनमा खट्ने पार्टीको नेता, कार्यकर्ता, वाइसीएल, विद्यार्थी, महिला तथा दलित संगठन, वडाका आम मतदाता सबैमा धन्यवाद ज्ञापन गर्नुभएको छ । निर्वाचनका क्रममा पार्टी र पार्टीका उम्मेदवारले गरेका घोषणा प्रतिबद्धता कार्यान्वयन गर्न पार्टीले कुनै कसर बाँकी नराख्ने भन्दै विज्ञप्तीमा वडाको समग्र विकास आवश्यक्ता र मागका आधारमा गर्न पार्टी प्रतिबद्ध रहेको उल्लेख गरिएको छ ।

निर्वाचन सम्पन्न भइ नयाँ जनप्रतिनिधिले पदभार ग्रहण समेत गरिसकेको सन्दर्भमा निर्वाचनको प्रक्रियासँग सम्बन्धित कुरा छाडेर वडाको बृहत्तर विकासमा लाग्न अरु राजनीतिक दल, तिनका उम्मेदवार तथा आम वडाबासीमा आग्रह गरिएको छ ।

आगामी दिनमा पनि पार्टीप्रतिको सहयोग, साहनुभूति यस्तै गरी पाइयोस् र पार्टीले पनि निरन्तर जनताको सेवा गर्न पाइराख्ने वातावरण बनाउन लागि पर्ने प्रतिबद्धता पनि विज्ञप्तीमा गरिएको छ । ६ नम्बर वडामा माओवादीका उम्मेदवार भानु मल्ल वडाध्यक्षमा, अनिल बुढा, लक्ष्मण भण्डारी, निर्मला रसाइली र कृष्णा रावल बोहरा वडा सदस्यमा निर्वाचित भएका छन् ।