रुकुम पश्चिमको आठबीसकोट नगरपालिका वडा नम्बर १० का एक व्यक्तिले आफ्नो जन्मदिनको अवसरमा अक्षयकोष स्थापना गरेका छन् । हाल अमेरिकाको क्यालिफोर्नियामा बस्दै आएका समाजसेवी प्रेमराज केसीले आफ्नो ३६ औं जन्मदिनको अवसर पारेर आठबीसकोट १० को जनविकास मावि घारीखोलामा ‘जन्मोत्सव अक्षयकोष’ स्थापना गर्नुभएको हो । 

गरिब तथा जेहन्दार विद्यार्थीहरुको पठनपाठनमा सहयोग पुर्याउने हेतुले अक्षयकोष स्थापना गरिएको उहाँले बताउनुभयो । जन्मदिनको अवसरमा अनावश्यक जमघट गर्दै परम्परागत तरिकाले गरिने फजुल खर्च कटौती गरेर सामाजिक कार्यमा लगाउन सके त्यसले समाज परिवर्तनमा मद्दत गर्नसक्ने संस्थापक केसीको भनाइ रहेको छ । केसीले ३६ औं जन्मदिनको अवसरमा ३६ हजार रुपैयाँको अक्षयकोष स्थापना गर्नुभएकाे हाे । अव देखि जति वर्ष भयाे त्यति नै रकम काेषमा जम्मा गर्दै जाने उहाँले बताउनुभयाे ।

अक्षयकोषमा रकम बढाउँदै लैजाने उहाँले प्रतिबद्धता जनाउनुभएको छ । केसी एन.आर.एन.ए क्यालिफोर्निया च्याप्टरका उपाध्यक्ष समेत रहनुभएको छ । यसैबिच केसीले स्थापना गरेको अक्षयकोषमा अन्य सहयोगिहरु पनि थपिन थालेका छन् । सडक विभागका लिलाबहादुर भण्डारीले आफ्नो ४६ औ जन्मोत्सबको अबसरमा ४ हजार ६ सय ७७ रुपैया अक्षयकोषमा जम्मा गर्नुभएको छ । 

यस्तै आठबीसकोट नगरपालिका १० घारीखोलाका शक्तिराज केसीले पनि जन्मदिनको अवसर पारेर अक्षयकोषमा ३ हजार रुपैयाँ सहयोग गर्नुभएको छ ।