रुकुम पूर्वको पुथाउत्तरगंगा गाउँ कार्यपालिकाको प्रवक्तामा टिकासाई घर्ती मगर चयन हुनु भएको छ । कार्यपालिका बैठकमा अध्यक्ष पुनिराज घर्ती मगरले टिकासाईलाई कार्यपालिका प्रवक्ता तोक्नुभएको हो । ५ नम्बर वडाध्यक्ष घर्तीलाई सामाजिक विकास समितिको पनि संयोजक बनाइएको छ ।

कार्यपालिका बैठकले अरु विभिन्न विषयगत समिति पनि गठन गरेको छ । जसबहादुर श्रीपालीको संयोजकत्वमा आर्थिक विकास समिति, दिलमान पुनको संयोजकत्वमा पूर्वाधार समिति, र्हकप्रसाद रोकाको संयोजकतमा सुशासन तथा संस्थागत समिति गठन गरिएको छ ।

पूर्णा मल्ल शाहीको संयोजकत्वमा वन, वातावरण तथा विपद् व्यवस्थापन समिति, उपाध्यक्ष भूपेन्द्रा बुढाको संयोजकत्वमा न्यायिक समिति गठन गरिएको गाउँपालिका अध्यक्ष पुनिराज घर्तीले जानकारी दिनुभयो । उपाध्यक्षकै संयोजकत्वमा राजश्व परामर्श समिति, अनुगमन समिति पनि गठन गरिएको छ ।

गाउँपालिका अध्यक्ष पुनिराज घर्तीको संयोजकत्वमा स्रोत अनुमान तथा बजेटका सिमा निर्धारण समिति गठन गरिएको छ । अध्यक्षकै संयोजकत्वमा आवधिक योजना तर्जुमा समिति गठन गरिएको छ । कार्यपालिका बैठकले संघीय तथा प्रदेश सरकारलाई विभिन्न योजना माग गर्ने निर्णय पनि गरेको छ ।

गाउँपालिका अध्यक्ष घर्तीका अनुसार सडक निर्माण,  सडक स्तरोन्नती, नमूना वस्ति विकास लगायतका योजना माग गर्ने निर्णय कार्यपालिका बैठकले गरेको छ ।  तकसेरा–ढोरपाटन सिकार आरक्ष सडक निर्माण सुचारु गर्नका लागि सिकार आरक्ष, वन विभाग र मन्त्रालयमा माग गर्ने निर्णय पनि भएको अध्यक्ष घर्तीले बताउनुभयो ।