रुकुम पूर्वको सिस्ने गाउँपालिका वडा नम्बर २ ले ५ वर्षमा वडामा भएका विकास निर्माण र त्यसमा खर्चिएको बजेट सार्वजनि गरेको छ । निवर्तमान वडाध्यक्ष  जीवन केसीले नयाँ जनप्रतिनिधिको पदभार ग्रहणको अवसर पारी २०७४ देखि २०७९ सालको सुरुसम्ममा सम्मका विकास निर्माण, सचेतनामूलक कार्यक्रम तथा त्यसमा खर्च भएको बजेट विवरण सार्वजनिक गर्नुभएको हो । वडा कार्यालयमा वडाबासीको उपस्थितिमा वडाले गरेका कामकाजका बारेमा जानकारी गराइएको थियो भने उठेको प्रश्नहरुको उत्तर पनि दिइएको थियो । विभिन्न १४ वटा शीर्षकमा विकास र बजेट खर्च भएको छ ।

यसमा अरु नियमित सेवा प्रवाह तथा घुम्ती सेवा शिविरहरु सञ्चालन गरिएको निवर्तमान वडाध्यक्ष केसीले बताउनुभयो । उहाँका अनुसार सिस्ने गाउँपालिका, लुम्बिनी प्रदेश सरकार, संघीय सरकार तथा विभिन्न विकासे नियोगको सहयोगमा ति विकास भएको र बजेट पनि त्यसरी परिचालन भएको छ । सार्वजनिक भएको प्रतिवेदन अनुसार यस वडामा यी ५ वर्षको अवधिमा झण्डै ५० करोड बजेट सुनिश्चित भएको छ । ४९ करोड २९ लाख ३५ हजार सुनिश्चित भएको छ । जसमध्य केही बजेट कार्यान्वयनकै क्रममा रहेको र अधिकांश बजेट खर्च भइसकेको केसीले जानकारी दिनुभयो । 

कृषि तथा पशु सेवातर्फः
वडामा कुषि र पशु सेवातर्फ ८५ लाख ६० हजार रुपैयाँ बजेट खर्च भएको छ । विभिन्न निकायबाट प्राप्त बजेटबाट ५ वर्षको अवधिमा यस वडामा कोभिड विशेष अनुदान वितरण, सुधारिएको खोर निर्माण, नर्सरी स्थापना, तरकारी खेतीमा सहयोग, भेडा पालन, फलफूलका बीउ तथा विरुवा वितरणको काम भएको छ । कृषि औजार सहयोग, वडामै कृषि तथा पशु सेवा केन्द्र स्थापना र सञ्चालन, कृषि तथा पशु परामर्श र पटक पटक कृषि तथा पशु उपचार शिविर सम्पन्न भएको छ । 

स्वास्थ्य सेवा तर्फः 
स्वास्थ्य सेवा तथा १० करोड २३ लाख बजेट खर्च भएको छ । स्वास्थ्य चौकी भवन निर्माण, पालिका अस्पतालको भवन निर्माण, सामुदायिक स्वास्थ्य इकाई स्थापना, घुम्ती स्वास्थ्य सेवा शिविर सञ्चालन भएका छन् । कोभिड रोकथाम तथा नियन्त्रणमा विशेष पहल गरिएको जनाइएको छ । ५ शैय्याको अस्पतालका आधारभुत काम सकेर निर्माणको चरणमा पुगेको छ । 

सञ्चारतर्फः
यस अवधिमा यस वडाको सुद्रीमा नेपाल टेलिकमको टावर सञ्चालनमा आएको छ । फोःरजि सेवा सुचारु भएको छ । यसबाट यस आसपासबासीलाई सञ्चारको सहज पहुँच पुगेको छ । वडा कार्यालय, स्वास्थ्य चौकी र र विद्यालयमा इन्टरनेट सेवा जडान र सुचारु गरिएको छ । वडाले पर्यटक किताब प्रकाशन गरेर वितरण गरेको छ । 

शिक्षातर्फः
वडामा ५ वर्षको अवधिमा शिक्षातर्फ पनि महत्वपूर्ण काम भएका छन् । शिक्षातर्फ ५ वर्षको अवधिमा २ करोड १४ लाख ७५ हजार बजेट खर्च भएको छ । नायगाडमा ८ कोठे छात्राबास बनेको छ । सोही ठाउँमा २ कोठे पक्कि विद्यालय भवन बनेको छ । नायगाडमै जस्तावाला २ कोठे भवन बनेको छ । किंदामा जस्तावाला ३ कोठे विद्यालय भवन बनेको छ । खरिबोट र दत्कुनामा दुई वटा ट्रष्ट भवन बनेका छन् । नायगाड, खरिबोट र लैपाको विद्यालयमा शौचालय निर्माण भएका छन् ।

नायगडामा विज्ञान प्रयोगशाला, पुस्तकालय र विद्यालय सूचना प्रविधि विकासको काम गरिएको छ । खरिबोट र सुद्रीमा २ वटा विद्यालय मर्मतको काम गरिएको छ । ९ वटा कम्प्युटर विद्यालयमा प्रदान गरिएको छ । बाल शिक्षामा पोषण कार्यक्रम लागु गरिएको छ । बालमैत्री कक्षा व्यवस्थापन गरिएको छ । हिमालय मावि नायगाडमा १ देखि ५ कक्षासम्मलाई अंग्रेजी माध्यममा पठन पाठन गराउन थालिएको छ । लैपामा बाल शिक्षा स्थापना गरी सञ्चालन गरिएको छ । वडाका सबै विद्यालयमा रंगरोगन, खेलकुद सामग्री प्रदान लगायतका कार्यक्रम भएका छन् । 

उर्जा विकासतर्फः
उर्जामा पनि वडामा महत्वपूर्ण काम भएको छ । उर्जा विकासमा मात्रै वडामा २ करोड २ लाख बजेट खर्च भएको छ । छिपखोलामा ४० किलोवाट उत्पादन क्षमताको विद्युत उत्पादन भएको छ । तुवाङखोला लघु जलविद्युत आयोजना मर्मत गरी सुचारु गरिएको छ । छिपखोलाको लघु जलविद्युत योजना मर्मत गरिएको छ । 

पर्यटनतर्फः
वडाको पर्यटन विकासमा महत्वपूर्ण काम भएका छन् । ५ वर्षको अवधिमा यहाँ ३ करोड ५० लाख खर्च भएको छ । नेटामा सहिद स्मृति पार्क निर्माणको चरणमा छ । यो निर्माणको काम अब अन्तिम चरणमा पुगेको छ । सुद्रिमा मुक्तिप्रहार स्मृति बाटिका निर्माण भएको छ । नायगाडमा पाहुना घर बनेको छ । धङ्गु दह संरक्षणको काम भएको छ । धार्मिक तथा पर्यटन पूर्वाधार विकास अन्तर्गत प्वाङ, दत्कुना र नायगाडमा मन्दिर निर्माण भएको छ । कला, संस्कृति तथा पञ्चेबाजा संरक्षण गरिएको छ । पर्यटन पदमार्ग नायगाड–लैपा–ख्याप–फूर्का–कालढार–राम्री बनेको छ । 

सडकतर्फः
यो वडा पत्यक्ष सडकमा जोडिएको छैन । सानीभेरी नदीमाथी पुल नबनेका कारण पालिका र अरु सडकसँग यो वडा नजोडिएपनि यहाँ सडक निर्माणको काम भएको छ । सडकतर्फ १० करोड ५३ लाख बजेट सुनिश्चित भएर काम भइरहेको छ । यसमध्य ३ करोड ५५ लाखको काम भइरहेको छ । अरु काम भइसकेको छ । ११ किलोमिटर सडक निर्माण भएको छ । नायगाडबाट अरु गाउँ हुदै १ नम्बर वडाको सिस्नेतर्फ जाने सडकको काम भइरहेको । 

झोलुङ्गे पुलतर्फः
यस वडामा सबभन्दा धेरै बजेट खर्च भएको क्षेत्र हो झोलुङ्गे पुल हो । यहाँ झोलुङ्गे पुल निर्माणमा १५ करोड ३६ लाख रुपैयाँ खर्च भएको छ । ८ वटा झोलुङ्गे पुल निर्माण भएका छन् । २ वटा ट्रष्ट पुल निर्माण भएका छन् । १ वटा आरसीसी पुल निर्माण भएकाे छ । सबभन्दा लामो झोलुङ्गे पुल कोपेधारा–सक्मेरी निर्माणको क्रममा छ । २ वटा पुल मर्मतको काम पनि यो ५ वर्षको अवधिमा गरिएको छ । 

सिचाईतर्फः
यो वडाले सिचाईतर्फ पनि उल्लेख्य काम गरेको छ । ५ वर्षमा १ करोड ६७ लाख सिचाईतर्फ खर्च भएको छ । छिपखोला सिचाई योजना निर्माण सम्पन्न भएको छ । इटिघारी प्लाष्टिक पोखरी निर्माण भएको छ । तिप्तरा सिचाई योजना निर्माण सम्पन्न भएको छ । गोलखारा सिचाई योजना निर्माण भएर सञ्चालनमा आएको छ ।

खानेपानीतर्फः 
खानेपानीमा वडाले उल्लेख्य काम गरेको छ । खानेपानी निर्माणमा ५ वर्षको अवधिमा १ करोड ७ लाख बजेट खर्च भएको छ । वडामा ४ वडा खानेपानी योजना निर्माण, मर्मत तथा संरक्षणका काम भएका छन् । प्वाङ–किंदा खानेपानी योजना निर्माण भएको छ । ठस्के,जौली,कुचिवाङ, कुरिपानी, बल्लेजुरी, नेटा, लैपा र छुरवाङको खानेपानी मर्मत गरिएको छ । रेजा, सिजारीखोला र मुसिको खानेपानी मुहान संरक्षणको काम सम्पन्न भएको छ । विद्यालय तथा सामुदायिक क्षेत्रमा खानेपानीको निर्माण तथा मर्मतको काम पनि ५ वर्षको अवधिमा गरिएको छ । 

सामुदायिक पूर्वाधारतर्फः
यस वडाले सामुदायिक पूर्वाधारतर्फ पनि धेरै काम गरेको छ । सार्वजनिक प्रतिवेदन अनुसार ५८ लाख २५ हजार रुपैयाँ खर्च भएको छ । वडाभर ६ वटा सामुदायिक भवन निर्माण भएका छन् । ८ वटा सार्वजनिक शौचालय निर्माण भएका छन् । २ वटा प्रतिक्षालय निर्माण भएर सञ्चालनमा आएका छन् । २ वटा सुधारिएको आरण बनाइएको छ भने एक वटा विद्युतीय घट्ट निर्माण गराइएको छ । 

युवा तथा खेलकुदतर्फः
युवा तथा खेलकुदमा पनि ५ वर्षको अवधिमा धेरै काम भएका छन् । केही पूर्वाधारमा काम भएको छ भने केही रोजगार, स्वरोजगारमा काम भएको छ । यसमा ४१ लाख ७७ हजार बजेट खर्च भएको छ । छिपखोला र नायगाडमा खेलमैदान निर्माण र घेराबारको काम भएको छ । सुद्रीमा खेलमैदान निर्माण भएको छ । नायगाडमा नयाँ खेलमैदान बनेको छ । 

घोडेटो बाटो निर्माण, मर्मत तथा सिढि निर्माण तर्फः
घोडेटो बाटो निर्माण, मर्मत तथा सिढि निर्माण तर्फ ५० लाख बजेट खर्च भएको छ । ३ वटा घोडोटो बाटो निर्माण गरिएको छ । ३० किलोमिटर लम्बाइका बाटो बनेका छन् । ८ वटा घोडेटो बाटो मर्मत गरिएको छ । ८ सय मिटर लामो सिढि निर्माणको काम पनि सम्पन्न भएको छ । 

विविध कार्यक्रमतर्फः
अन्य विविध कार्यक्रमतर्फ  ५० लाख ९८ हजार बजेट खर्च भएको छ । महिला तथा दलित सिप विकास तथा क्षमता विकास तालिम सम्पन्न भएको छ । हरेक वर्ष जेष्ठ नागरिक सम्मान कार्यक्रम सम्पन्न गरिएको छ । अपांगता व्यक्तिको सम्मान तथा सहायता कार्यक्रम गरिएको छ । मोराबाङमा तटबन्ध निर्माण गरिएको छ । समुदाय तथा कार्यालयका लागि स्ट्रेचर वितरण गरिएको छ । विपद् व्यवस्थापनमा सहयोग गरिएको छ । वडा कार्यालय र स्वास्थ्य चौकीमा सौर्य उर्जाको व्यवस्थापन पनि गरिएको छ । १५ वटा सुरक्षित आवास बनेका छन् ।

अति विपन्न ४० घरपरिवारलाई राहत प्रदान गरिएको छ । यसको साथै वडाले घरघरमा पुगेर सामाजिक सुरक्षा भत्ता प्रदान गर्ने गरेको, एकीकृत घुम्त सेवा शिविर सञ्चालन गर्ने गरेको पनि थियो । घुम्ती शिविर मार्फत अपांगता परिचय पत्र प्रदान गरिएको छ । सबैलाई खोपको पहुँचमा पुर्याएको पनि वडाले दावी गरेको छ । घरधुरी छनौट गरेर आयोडिनयुक्त नुन वितरण गरेको, कोरोना संक्रमितलाई वडाध्यक्षको सेवासुविधाबाट अण्डा सहयोग गरेको जस्ता विवरण पनि प्रतिवेदनमा उल्लेख छ ।  

५ वर्षे प्रगतिको पूर्ण विवरणः