रुकुम पश्चिमको मुसीकोट नगरपालिका वडा नम्बर ११ पाछिवाङ टोलमा एक घर एक धारा निर्माणको काम अन्तिम चरणमा पुगेको छ । आर्थिक वर्ष २०७८/०७९ को फागुन देखि सुरु गरिएको निर्माणको काम अन्तिम चरणमा पुगेको हो । धाराको रगं रोगन गर्न र घर घरै निर्माण गरिएका धारामा पानी पुग्न असार मसान्तसम्म समय लाग्ने खानेपानी उपभोत्ता समितिका अध्यक्ष बमबहादुर पुनले बताउनुभयो । अध्यक्ष पुनका अनुसार एक घर एक धारा निर्माण भएपछि पाछिवाङ टोलका ३५ घरधुरीले घर घरै खानेपानीको प्रयोग गर्न पाउने छन् । 

उक्त टोलमा खानेपानी पुर्याउनको लागि पाछिवाङ टोलमा लगभग  २४ सय मिटर टाढाबाट पानी पुर्याइएको छ । यस आयोजनाका लागि खानेपानी तथा उर्जा विकास कार्यालय रुकुम पश्चिमबाट ४ लाख ९२ हजार रकम प्राप्त भएको छ । ७ लाख ८२ हजार बरावरको भने स्थानीयले श्रमदान गरेको खानेपानी उपभोक्ता समितिका अध्यक्ष पुनले बताउनुभयो । घर घरै खानेपानी पुगेपछि त्यस टोलका स्थानीयलाई खानेपानीको जोहो गर्न सहज हुने छ । हाल त्यहाँका स्थानीयले बोकेर पानीको जोहो गर्ने गरेका छन् ।